«Մաքուր երկաթ» գործարանի աշխատակիցն այրվածքներ է ստացել գործարանի տարածքում տեղի ունեցած հրդեհի հետևանքով, երեքշաբթի «Նովոստի-Արմենիա» գործակալությանը տեղեկացրեցին ՀՀ ԱԻՆ Փրկարար ծառայությունից:
Ինչպես նշվում է տեղեկատվության մեջ, «Մաքուր երկաթ» գործարանում բռնկված հրդեհի մասին ահազանգը ստացվել է նախօրեին ուշ երեկոյան:
«Դեպքի վայր մեկնած հրշեջներն ահազանգը ստանալուց 20 րոպե անց կարողացել են մեկուսացնել և մարել հրդեհը: Հրդեհի հետևանքով մոլիբդենի հալեցման արտադրամասում, երկաթյա տարայի մեջ, այրվել է մոլիբդենի օքսիդ և 1 մ մալուխ», - ասվում է տեղեկատվության մեջ:
Հրդեհի հետևանքով գործարանի աշխատակից Էմիլ Ամուրջանյանը 1-ին և 2-րդ կարգի այրվածքներով տեղափոխվել է Այրվածքների և ճառագայթային բժշկության կենտրոն: Բժիշկների կողմից տուժածի առողջական վիճակը բնութագրվել է միջին ծանրության:-0-
