ՀՀ Սահմանադրական դատարանը երեքշաբթի նիստի ժամանակ քննեց հայ-թուրքական արձանագրությունները՝ երկրի Սահմանադրությանը համապատասխան լինելու հարցը, որից հետո ՍԴ դատավորները հեռացան խորհրդակցական սենյակ, որպեսզի որոշում կայացնեն:
Ինչպես տեղեկացնում է «Նովոստի-Արմենիա» գործակալության թղթակիցը, գործի զեկուցող է նշանակվել ՍԴ դատավոր Վլադիմիր Հովհաննիսյանը, ՀՀ նախագահի պաշտոնական ներկայացուցիչ՝ ՀՀ արտգործնախարար Էդվարդ Նալբանդյանը:
Ինչպես հայտնեց ՍԴ նախագահ Գագիկ Հարությունյանը, ՍԴ որոշման համաձայն գործի քննությունը կատարվում է գրավոր ընթացակարգով, դատարանին ներկայացված փաստաթղթերի հիման վրա:
Նա ավելացրեց, որ նախօրեին դատարանի շենքի մոտ բազմամարդ հավաք է տեղի ունեցել, որի մասնակիցները գրավոր ներկայացրել են իրենց նկատառումները՝ արձանագրությունների վերաբերյալ:
Նրա խոսքով, այդ փաստաթղթերը փոխանցվել են ՍԴ բոլոր անդամներին: «Ես արդեն հասցրել եմ ծանոթանալ այդ փաստաթղթերին և հույս ունեմ, որ դրանց կծանոթանան դատարանի մյուս անդամները ևս և իրենց դիրքորոշումը կներկայացնեն»,- ասաց Հարությունյանը՝ ավելացնելով, որ քննվող հարցը բացառիկ նշանակություն ունի: ՍԴ նախագահը նշեց, որ հանրությանը նախօրոք կտեղեկացնեն, թե երբ են որոշում կայացնելու:
ՍԴ նիստին մասնակցում են մի շարք քաղաքական կուսակցությունների, այդ թվում, է ՀՀԿ, ՀՅԴ, «Նոր ժամանակներ» կուսակցության» և «Ժառանգության» ներկայացուցիչներ:
Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ հայոց ցեղասպանության միջազգային ճանաչման գործընթացին:-0-
