Հետևելով Հայաստանի խանութներում, սուպերմարկետներում և շուկաներում տեղի ունեցող նախատոնական իրարանցումին՝ կարելի է մտածել, թե տնտեսական ճգնաժամը շրջանցել է Հայաստանը:
Չնայած տնտեսական ծանր ժամանակներին ու պարենամթերքի գների միջինը 10-20 տոկոսանոց աճին՝ տարվա արդյունքներով կանխատեսվող 5,5 տոկոսի պաշտոնական գնաճի պայմաններում, հայերը նախընտրում են չհրաժարվել տոնական ավանդական ուտեստներից:
«Սպառողների իրավունքների պաշտպանություն» հասարակական կազմակերպության նախագահ Աբգար Եղոյանը «Նովոստի-Արմենիա» գործակալությանը տեղեկացրել է, որ միջինը ամանորյա սեղանը մեկ հոգու համար կազմում է մոտ 130 ԱՄՆ դոլար:
Այսինքն, չորս հոգուց բաղկացած ընտանիքում տոնական հյուրասիրությունը կկազմի ավելի քան 500 դոլար, որը քիչ գումար չէ՝ հաշվի առնելով, որ հանրապետությունում միջին աշխատավարձը չի գերազանցում 250 դոլարը:
«Ճգնաժամի պատճառով քաղաքացիների եկամուտներն այս տարի զգալի կրճատվել են, և տոնական սեղանի գնումները, ամենայն հավանականությամբ, արվում են «սև օրվա» համար կուտակած գումարով: Բանն այն է, որ հայերը այսպիսի հոգեբանություն ունեն՝ տոնական հյուրասիրության համար տնտեսել չի կարելի», - ասել է Եղոյանը:
Կազմակերպության նախագահի խոսքերով՝ մյուսներից ետ չմնալու և ընտիր ուտեստներով հյուրերին զարմացնելու ձգտումն այս օրերին հայ տնտեսային տնտեսուհիների գլխավոր նպատակն է:
Նախորդ տարվա պես այս տարի ևս նկատվում է մրգի և մսամթերքի գների բարձրացում:
«Չեմ կարող ասել, թե որքանով են կոնկրետ բարձրացել գները, սակայն դա Հայաստանում ավանդական երևույթ է: Դա, իհարկե, հակասում է շուկայի օրենքներին, քանի որ վաճառականների համար ավելի շահավետ կլիներ վաճառել ապրանքը շատ ավելի ցածր գնով, և գնորդներն ավելի շատ կլինեին», - ասել է Եղոյանը:
Միաժամանակ նա ընդգծեց, որ գների բարձրացման հետևում կանգնած չէ հակամրցակցային համաձայնագիր կամ գերիշխող դիրքի չարաշահում. զուտ շուկայի ավանդական արձագանքն է պահանջարկի նկատմամբ:
Եղոնյանն ասել է, որ տոներից հետո գները կվերադառնան իրենց տեղը, և արքայախնձորը կարժենա ոչ թե 3500 դրամ (գրեթե 10 դոլար), այլ 1500 դրամ (շուրջ 4 դոլար):
Սակայն այժմ, ըստ երևույթին, արքայախնձորի սարսափելի գները չեն կանգնեցնում հայերին: Ամանորին հաշված օրեր են մնացել, և հայերն իրենց հյուրերին կհյուրասիրեն բլիթներով, բդով, խաղողի տերևով տոլմայով և մայրաքաղաքային աղցանով: Եվ առատ ճաշկերույթից հետո հայերը ստիպված կլինեն ողջ հունվարի ընթացքում, ոմանք նաև ավելի երկար, գոտիներն ավելի ամուր ձգել: Չէ՞ որ ճգնաժամը դեռ ոչ ոք չեղյալ չի համարել:
Սակայն նույնիսկ նման հեռանկարի գիտակցումը չի կանգնեցնում երկրի բնակչությանը. չէ՞ որ ինչպես դիմավորես Նոր Տարին, այնպես էլ այն կանցկացնես, այդ պատճառով ամանորյա սեղանը լի է լինելու տարատեսակ ուտեստներով: Եվ միգուցե սա է մեր հայրենակիցների արժանի պատասխանը չարաբաստիկ գլոբալ ֆինանսատնտեսական ճգնաժամին:-0-
