Հայաստանի բնապահպանական պետական տեսչության ղեկավար Տիգրան Գրիգորյանը և նրա տեղեկալ Արսեն Պետրոսյանը ձերբակալվել են կաշառակերության կասկածանքով, տեղեկացնում է Հայաստանի Ոստիկանության մամուլի ծառայությունը։
«ՀՀ բնապահպանության նախարարության աշխատակազմի բնապահպանական պետական տեսչության պետի տեղակալ, 51-ամյա Արսեն Պետրոսյանը մի ընկերությունում կատարած ստուգման արդյունքում հայտնաբերված բնապահպանական խախտումներն ամբողջությամբ չարձանագրելու և կազմվող ակտի գումարի չափը մինչև 10 միլիոն դրամ նվազեցնելու համար պահանջել է 5 միլիոն դրամ կաշառք»,- ասվում է հաղորդագրությունում։
Մամուլի ծառայությունում նշեցին, որ ոստիկանության Կազմակերպված հանցավորության դեմ պայքարի գլխավոր վարչության ծառայողների իրականացրած միջոցառումների արդյունքում` դեկտեմբերի 28-ին, ՀՀ բնապահպանության նախարարության իր աշխատասենյակում կաշառք վերցնելու փաստով Արսեն Պետրոսյանը մերկացվել է: Նրա մոտ հայտնաբերվել է վերցված գումարից 1.210.000 դրամը, իսկ մնացած 3.790.000 դրամը Ա. Պետրոսյանը հասցրել էր փոխանցել նույն տեսչության պետ, 1960 թ. ծնված Տիգրան Գրիգորյանին:
Միջոցառման ընթացքում, բացի վերցված կաշառքից, Ա. Պետրոսյանն իր գրպաններից ներկայացրել է նաև 2 միլիոն դրամ (5,3 հազար դոլար) և ԱՄՆ 1.000 դոլար, իսկ տեսչության պետ Տ. Գրիգորյանը, բացի Ա. Պետրոսյանի կողմից տված կաշառքի գումարից, նույն պոլիէթիլենային փաթեթի մեջ ներկայացրել է 3.800.000 դրամ (10 հազար դոլար), 15.000 դոլար ու ևս 18.000 դոլար:
«Արսեն Պետրոսյանը և Տիգրան Գրիգորյանը ձերբակալված են:
Նախապատրաստված նյութերով ՀՀ քրեական օրենսգրքի 311 հոդվածի 4-րդ մասով (կաշառք ստանալը) հարուցվել է քրեական գործ»,- տեղեկացնում է Ոստիկանության մամուլի ծառայությունը։ -0-
