Հայաստանն անցնող տարում աշխարհին ներկայացավ որպես տարածաշրջանային առաջնորդներից ու տարածաշրջանում օրակարգը ձևավորող երկրներից մեկը, ասաց Հայաստանի Հանրապետական կուսակցության խորհրդարանական խմբակցության քարտուղար Էդուարդ Շարմազանովը:
«Չնայած, որ տարին ծանր էր, սակայն արտաքին քաղաքականության ճակատում Հայաստանը ճշտեց իր դիրքը, և մեր քաղաքական կշիռը բարձրացավ, մասնավորապես, հայ-թուրքական հարաբերությունների համատեքստում», - երկուշաբթի ասաց նա «Նովոստի» միջազգային մամուլի կենտրոնում:
Շարմազանովը նշեց, որ եթե տարեսկզբին հայ-թուրքական հարաբերությունների կարգավորման գործընթացը կրում էր կիսատ բնույթ, ապա տարվա արդյունքներով մենք ունենք ստորագրված արձանագրություններ, և ուժի բոլոր համաշխարհային կենտրոնները, այդ թվում նաև ԱՄՆ-ն, Եվրամիությունն ու Ռուսաստանը, բացառությամբ Ադրբեջանի, ողջունել են նախագահ Սարգսյանի քայլերը:
«Բոլորն արձանագրեցին, որ արձանագրություններում չկան նախապայմաններ, ավելին՝ այդ մասին առաջին անգամ հրապարակավ հայտարարեց նաև Էրդողանը Վաշինգտոնում», - ասաց նա:
Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Խոսելով ղարաբաղյան խնդրի մասին՝ Շարմազանովը նշեց, որ ԵԱՀԿ երկրների նախարարների հայտարարություններում՝ ի հեճուկս Ադրբեջանի ոչ կառուցողական և ռազմատենչ հայտարարությունների, ընդունվել է ուժի կիրառումը բացառող կետ:
Անդրադառնալով Հայաստանի և Ռուսաստանի հարաբերություններին՝ Շարմազանովը նշեց, որ դրանք բավականին ինտենսիվ զարգանում են, մասնավորապես, տեղի են ուենցել նախագահների երկկողմ բազմաթիվ հանդիպումներ:
«ՀԱՊԿ շրջանակներում Հայաստանի մասնակցությունը բարձրանում է, և պատահական չէ, որ Բորդյուժան Հայաստանը համարել է ՀԱՊԿ-ի լոկոմոտիվ», - ընդգծեց նա՝ ավելացնելով, որ ինտենսիվորեն զարգանում են նաև ՆԱՏՕ-ի հետ հարաբերությունները:-0-
