Հայաստանում 2009 թ.-ին բացահայտվել և թրաֆիքինգի զոհ է ճանաչվել 60 մարդ, հաղորդում է ՀՀ ոստիկանության մամուլի ծառայությունը:
«Հետագա աջակցության նպատակով բացահայտված զոհերից 22-ը ուղղորդվել են հասարակական կազմակերպություններ։ Որպես մեղադրյալ ներգրավվել է 10 անձ, որոնցից մեկի վերաբերյալ գործը կարճվել է, չորսը գտնվում են կալանքի տակ, երկուսն արդեն դատապարտվել են, իսկ չորսի նկատմամբ հետախուզում է հայտարարված», - ասվում է տեղեկատվության մեջ:
ՀՀ ոստիկանության տվյալների համաձայն՝ ընդհանուր առմամբ ներկայումս թրաֆիքինգի մեղադրանքով հետախուզման մեջ է 20 անձ։ Տեղեկատվության մեջ նշվում է, որ քրեական օրենսգրքի 132 (մարդկանց առևտուր) և 132.1 (Մարմնավաճառության կամ սեռական այլ շահագործման, հարկադիր աշխատանքի կամ ծառայությունների, ստրկության կամ ստրկությանը հավասարազոր վիճակի կամ կախյալ վիճակի հասցնելու, ինչպես նաեւ մարդու օրգանները վերցնելու նպատակով մարդկանց հավաքագրելը, փոխադրելը, հանձնելը, թաքցնելը կամ ստանալը բռնություն գործադրելով կամ դա գործադրելու սպառնալիքով, առեւանգելու, խարդախության, այլ խաբեության, իշխանությունը չարաշահելու կամ վիճակի խոցելիությունն օգտագործելու կամ մեկ այլ անձնավորության վերահսկող անձի համաձայնությունն ստանալու նպատակով՝ վճարման կամ շահ ստանալու տեսքով կաշառելու միջոցով) հոդվածների հատկանիշներով 2009 թ. ընթացքում ընդհանուր առմամբ դատապարտվել է 10 անձ:
«2009 թ. ընթացքում ոստիկանության կողմից լուրջ աշխատանք է կատարվել թրաֆիքինգի դեմ պայքարի ուղղությամբ, ինչի արդյունքում ՀՀ քրեական օրենսգրքի 132 և 132.1 հոդվածների հատկանիշներով վարույթ է իրականացվել՝ 15 քրեական գործերով։Դրանցից 7-ը 2008 թ. հարուցված և 2009 թ. փոխանցված գործեր են», - ասվում է տեղեկատվության մեջ:
ՀՀ ոստիկանության տվյալների համաձայն՝ վեց գործերով հայտնաբերվել և տուժող են ճանաչվել ևս 21 զոհեր և նոր 2 անձանց մեղադրանք է առաջադրվել քրեական օրենսգրքի 132 և 132.1 հոդվածներով, 1 գործ (աշխատանքային թրաֆիքինգ) կարճվել է։
Երեք քրեական գործեր նախորդ տարիներին հարուցված, կասեցված, այնուհետև 2009-ին վերսկսված գործեր են, որոնցով հայտնաբերվել և տուժող են ճանաչվել 12 նոր զոհ և3 նոր նձի մեղադրանք է առաջադրվել քրեական օրենսգրքի 132 և 132.1 հոդվածներով։
«Քրեական չորս գործեր հայտնաբերվել և հարուցվել են 2009-ին։ Դրանցից մեկը, որ վերաբերում էր ՀՀ-ից Ռուսաստանի Դաշնություն աշխատանքային թրաֆիքինգին, կարճվել է քրեական դատավարական օրենսգրքի 35 հոդվածով: Մյուս երեքով հայտնաբերվել և տուժող են ճանաչվել 14 զոհ։ Մեղադրյալները չորսն են», - ասվում է տեղեկատվության մեջ:-0-
