Հայոց ցեղասպանության թանգարան-ինստիտուտը համալրել է իր ֆոնդը նվիրատվությունների շնորհիվ

Հայոց ցեղասպանության թանգարան-ինստիտուտը համալրել է իր ֆոնդը հազարավոր ցուցանմուշներով «ՀԲԸՄ Լոս Անջելեսի Երիտասարդ արհեստավարժներ»-ի կողմից հանգանակված գումարի շնորհիվ:

«Նովոստի-Արմենիա» գործակալություն ստացված մամուլի հաղորդագրության համաձայն՝ հատկացված միջոցներով թանգարանը ձեռք է բերել շուրջ 150  արժեքավոր թանգարանային միավորներ, այդ թվում 75 միավոր հազվագյուտ սկզբնաղբյուրային գրականություն, որոնցից 30-ը` եզակի նշանակության, հնատիպ հրատարակություններ են:

Բացի այդ տարբեր աղբյուրներից ձեռք են բերվել հարյուրավոր հնատիպ ամսագրեր ու թերթեր, բնօրինակ լուսանկարներ, բացիկներ, մեդալներ, նամականիշեր, ինչպես նաև 19-րդ դարի վերջին ռուս լուսանկարիչ Դ. Ի. Երմակովի կողմից արված հայկական մշակութային հուշարձանները պատկերող բնօրինակ լուսանկարների բացառիկ հավաքածու (38 նմուշ):

Հայոց ցեղասպանության թանգարան-ինստիտուտն իր խորին երախտագիտւթյունն է հայտնում «ՀԲԸՄ Լոս Անջելեսի Երիտասարդ արհեստավարժներին» իրենց ազնիվ ու հայրենանվեր քայլի համար՝ հույս հայտնելով, որ հետայսու շարունակական կդառնա ընդհանուր հիշողության պահպանմանն ուղղված համագործակցությունը: -0-