ԵՐԵՎԱՆ, 25 դեկտեմբերի. /Նովոստի-Արմենիա/. Գլոբալ ֆինանսատնտեսական ճգնաժամը երևան հանեց Հայաստանի տնտեսության առավել թույլ կողմերն ու նշեց դիվերսիֆիկացիայի անհրաժեշտությունը, ուրբաթ ամփոփիչ մամուլի ասուլիսի ժամանակ ասաց վարչապետ Տիգրան Սարգսյանը:
«Համաշխարհային ֆինանսատնտեսական ճգնաժամը, լինելով աննախադեպ ազդեցության իր ծավալով ու տեմպերով, չէր կարող շրջանցել Հայաստանն ու չազդել նրա վրա: Եվ մենք ձեռնարկեցինք բոլոր անհրաժեշտ միջոցները դրա հաղթահարման համար: Ճգնաժամը երևան հանեց Հայաստանի տնտեսության առավել թույլ կողմերն ու նշեց դիվերսիֆիկացիայի անհրաժեշտությունը»,- նշեց նա:
Վարչապետի խոսքերով, դիվերսիֆիկացիա ապահովող ուղղությունների շրջանում անհրաժեշտ է առանձնացնել այն ոլորտները, որտեղ Հայաստանը մրցակցային առավելություններ ունի, օրինակ ՏՏ, գյուղատնտեսություն, գյուղատնտեսական արտադրանքի վերամշակում և դրա արտահանում, լեռնահանքային ոլորտ:
Միևնույն ժամանակ, կառավարության ղեկավարը հավելեց, որ առայժմ վաղ է ամփոփել 2009թ.-ը, և դեռևս ժամանակ է պետք ընթացիկ տարում տեղի ունեցած գործընթացների ավելի խոր հետազոտության ու հանրապետության առաջ կանգնած մարտահրավերի որոշման համար:
Ըստ վարչապետի, 2009թ.-ը լի էր տարբեր փորձություններով ու ցույց տվեց դրանց հաղթահարման ՀՀ հնարավորությունները: Միևնույն ժամանակ, Սարգսյանն ասաց, որ չնայած կառավարության ու հակաճգնաժամային միջոցների հասցեին շատ քննադատություն է հնչել, այնուամենայնիվ արդյունքները ցույց են տվել վարած քաղաքականության ճիշտ լինելը:
«2009 թ.-ին պետությունը 900 մլրդ դրամ է ծախսել այն դեպքում, որ 2008 թ.-ին ծախսերը կազմել են 810 մլրդ դրամ: Սակայն 2008 թ.-ին մենք ունեցել ենք տնտեսական աճ, իսկ 2009 թ.-նն ավարտում ենք գրեթե 15 տոկոսանոց անկմամբ»,- ընդգծեց Սարգսյանը:
ՀՀ կառավարության ղեկավարը հայտնեց, որ հավելյալ օտարումները 2009թ.-ին թույլ տվեցին խթանել տնտեսության որոշ ոլորտների զարգացումն ու մարտահրավերներին դիմակայելը, 16 տոկոսով բարձրացնել կնեսաթոշակները և 11 տոկոսով՝ աշխատավարձերը:
Ճգնաժամային տարում, նախնական տվյալներով, ստեղծվել է ավելի քան 3 հազար աշխատատեղ, լայնամասշտաբ վերականգնողական աշխատանքներ են տարվել աղետի գոտում, որոնք կշարունակվեն նաև 2010 և 2011 թվականներին: Նաև, նրա խոսքով, կառուցվել է գյուղական և հանրապետական նշանակության 415 կմ ճանապարհ, 300 կմ ջրատար:-0-
