2010թ.-ին Ղարաբաղյան հակամարտության կարգավորման դինամիկան չի փոխվի. վարչապետ

ԵՐԵՎԱՆ, 25 դեկտեմբերի. /Նովոստի-Արմենիա/. 2010թ.-ին Ղարաբաղյան հակամարտության կարգավորման դինամիկան չի փոխվի, կարծում է ՀՀ վարչապետ Տիգրան Սարգսյանը:

«2010 թ.-ին Ղարաբաղյան հակամարտության կարգավորման գործընթացի դինամիկան նույնը կլինի, ինչ որ այս տարի»,- ասաց Սարգսյանը ուրբաթ ամփոփիչ մամուլի ասուլիսի ժամանակ:

«Չեմ կարծում, որ Իրանի մասնակցությունը հակամարտության կարգավորման գործում իրական կլինի, քանի որ կարգավորման ձևաչափը չի փոփոխվի»,- հավելեց նա:

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:

-0-