ՀՀ նախագահը դժգոհ է 1988թ.-ի երկրաշարժից տուժաների համար նախատեսված բնակարաններում կատարված ներքին շինարարական աշխատանքների որակից
ՀՀ նախագահ Սերժ Սարգսյանը դժգոհություն է հայտնել 1988թ.-ի Սպիտակի ավերիչ երկրաշարժի հետևանքով անօթևան մարդկանց համար նախատեսված բնակարաններում կատարված ներքին շինարարական աշխատանքների որակի վերաբերյալ, հաղորդում է ՀՀ նախագահի մամուլի ծառայությունը:
Նախագահի դժգոհության պատճառը, մասնավորապես, դարձել են «Մուշ-2» թաղամասում կառուցվող բնակարանների ներքին հարդարման աշխատանքները, ինչի կապակցությամբ երկրի ղեկավարը չնախատեսված խորհրդակցություն է անցկացրել Շիրակի մարզպետարանում, որին մասնակցել են փոխվարչապետ, տարածքային կառավարման նախարար Արմեն Գևորգյանը, քաղաքաշինության նախարար Վարդան Վարդանյանը, ՀՀ գլխավոր ճարտարապետը, Շիրակի մարզպետը, Գյումրիի քաղաքապետը, կառուցապատող «Գլենդել Հիլզ» ընկերության ղեկավարները:
«Շենքերի ներքին հարդարման աշխատանքներում նկատելի են զգալի թերություններ, ինչն ուղղակի անթույլատրելի է: Նախատեսված շինարարական աշխատանքներն ամբողջ ծավալով իրականացնելու հետ մեկտեղ չպետք է տուժի որակը, և բոլոր թերությունները պետք է ամբողջովին վերացվեն», - ասել է նախագահն՝ ավելացնելով, որ կառուցապատող ընկերությունը և համապատասխան պետական գերատեսչությունները պետք է հետևություններ անեն:
Նախագահը նշել է, որ որ պետք է լուծվեն բոլոր բնակարանների ջեռուցման, գազիֆիկացման, սալիկապատման և սալօջախների տեղադրման հարցերը: «Մարդկանց նվազագույն բոլոր պայմանները պետք է ապահովվեն, և բնակարանները պետք է հարմարավետ լինեն ապրելու համար», - ընդգծել է նախագահը:
Նախագահը նաև հանձնարարել է լուծել տարածքի բարեկարգման, կանաչապատման, ենթակառուցվածքների ապահովման հետ կապված խնդիրները:
Քաղաքաշինության նախարարության և կառուցապատող «Գլենդել Հիլզ» ընկերության ղեկավարները խոստացել են, որ նշված աշխատանքները լիովին կավարտվեն, և շենքերը բնակության համար պատրաստ կլինեն հաջորդ տարվա մայիսի կեսին:-0-
