Թուրքիան արձանագրությունների վավերացման գործընթացը ՀՀ-ի վրա Ղարաբաղի թեմայով ճնշում գործադրելու գործիք է դարձրել

ԵՐԵՎԱՆ, 23  դեկտեմբերի. /Նովոստի-Արմենիա/. Թուրքիային հաջողվել է հայ-թուրքական արձանագրությունների վավերացման գործընթացը Հայաստանի վրա ճնշում գործադրելու գործիք դարձնել, կարծում է ընդդիմադիր ՀԱԿ-ի համակարգող Լևոն Զուրաբյանը:  

«Ակնհայտ է, որ Ղարաբաղյան հարցում խստանում է միջազգային ճիշումը, որի ապացույցը հայտարարությունն է այն մասին, որ միջազգային հանրությունը խնդրի շուտափույթ լուծում է ակնկալում: Սրան գումարվել է նաև ճնշման ևս մեկ բաղադրիչ՝ կապված հայ-թուրքական արձանագրությունների վավերացման հետ»,- չորեքշաբթի լրագրողներին ասաց Զուրաբյանը՝ պարզաբանելով ՀԱԿ դիրքորոշումը տվյալ հարցի շուրջ:

Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-