Հայ-թուրքական հարաբերությունների կարգավորման գործընթացը սպառնալիք չի պարունակում Հայաստանի ազգային անվտանգության համար, երեքշաբթի մամուլի ասուլիսի ժամանակ հայտարարել է ՀՀ ազգային անվտանգության խորհրդի քարտուղար Արթուր Բաղդասարյանը:
«Մենք տարվա ընթացքում մանրամասն քննարկել ենք այդ հարցը, և բազմաթիվ անգամ հնարավորություն ենք ունեցել հայտարարելու այն մասին, որ չնայած հայ-թուրքական հարաբերությունների կարգավորումը պարունակում է մի շարք մարտահրավերներ և պահանջում է շարունակական աշխատանք՝ այն իր մեջ սպառնալիքներ չի պարունակում ազգային անվտանգության համար», - ընդգծել է Բաղդասարյանը:
Նրա խոսքերով՝ շատ աշխատանք կա անելու, մասնավորապես, սահմանային ենթակառուցվածքների և սահմանակետերի ամրապնդման ուղղությամբ: «Այդ աշխատանքներում կներգրավվեն շահագրգիռ բոլոր գերատեսչությունները», - ավելացրել է Ազգային անվտանգության խորհրդի քարտուղարը:
Հայաստանի և Թուրքիայի հարաբերությունները բավականին լարված էին մինչև վերջերս, երբ երկու երկրների արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Երկու եկրների միջև բարդ հարաբերությունները պայմանավորված են մի շարք հանգամանքներով, որոնք կապված են, մասնավորապես, Անկարայի՝ ադրբեջանական դիրքորոշման պաշտպանությամբ ղարաբաղյան հարցում, ինչպես նաև Թուրքիայի սուր արձագանքի հետ 1915 թվականին Օսմանյան կայսրությունում Հայոց ցեղասպանության միջազգային ճանաչման հետ կապված։ -0-
