ՀՀ կառավարությունը մշտապես օժանդակելու է էներգետիկայի ոլորտում բոլոր ծրագրերի իրականացմանը և ոլորտի զարգացմանը, երեքշաբթի Էներգետիկի օրվա կապակցությամբ պարգևներ շնորհելիս ասաց վարչապետ Տիգրան Սարգսյանը:
«Իրան-Հայաստան գազատարի կառուցման ավարտի և էներգետիկի մասնագիտական օրվա առթիվ ոլորտի մի խումբ աշխատակիցներ պարգևատրվել են ՀՀ վարչապետի հուշամեդալով և խրախուսվել վարչապետի շնորհակալագրով: Այսօր վարչապետ Տիգրան Սարգսյանը հանդիսավոր պայմաններում անձամբ է նրանց հանձնել պարգևները»,- ասվում է կառավարության մամուլի ծառայության հաղորդագրության մեջ:
Խոսելով էներգետիկայի բնագավառում ձեռքբերումների և ոլորտում իրականացվող բարեփոխումների մասին` կառավարության ղեկավարն ասել է. «Այսօր այս դահլիճում հավաքվել են մարդիկ, ովքեր մեծ ներդրում ունեն ոլորտում: Համակարգի առջև համարձակ խնդիրներ են դրված. դա և ատոմակայանի նոր բլոկի կառուցումն է, որը որակապես կփոխի իրավիճակն էներգետիկայում և կունենա ոչ միայն տնտեսական, այլեւ քաղաքական մեծ բովանդակություն, և ջերմաէլեկտրակայանի կառուցումը, որը հաջողությամբ մոտենում է ավարտին, և մյուս նոր ծրագրերը»:
Բարձր գնահատելով էներգետիկների աշխատանքը՝ վարչապետը վստահեցրել է, որ կառավարությունը մշտապես օժանդակելու է բոլոր ծրագրերի իրականացմանը, այնուհետև շնորհավորել է նրանց գալիք Նոր տարվա կապակցությամբ և մաղթել, որ 2010 թվականը լինի զարգացման և հաջողությունների տարի:-0-
