ԵՐԵՎԱՆ, 22 դեկտեմբերի. /Նովոստի-Արմենիա/. Հայկական ԱԷԿ-ի նոր էներգաբլոկի համար հիմնական սարքավորումների ընտրությունը ծրագրվում է ավարտել 2010 թ.-ին, ասաց ՀՀ էներգետիկայի և բնական պաշարների նախարար Արմեն Մովսիսյանը:
«Հաջորդ տարի ծրագրվում է նաև սարքավորումների տեղադրման պատվերների մասին պայմանագրերի կնքմանն անցնել»,- ասաց Մովսիսյանը երեքշաբթի մամուլի ասուլիսի ժամանակ՝ ամփոփելով տարվա արդյունքները:
2009 թ.-ի կարևորագույն նվաճումներից մեկը, ըստ Մովսիսյանի, Հայկական ԱԷԿ-ի նոր էներգաբլոկի շինարարության փուլի մեկնարկն է:
«Արդեն ընտրված է խորհրդատվական ընկերությունը, որը կիրականացնի բոլոր խորհրդատվական աշխատանքները, շուրջ 20 օր առաջ «Ռոսատոմի» հետ համատեղ ընկերություն է ստեղծվել, որը սարքավորումներ կմատակարարի ռեակտորային կղզու համար»,- ասաց նա:
Նախագծերի կառավարիչ-ընկերության մրցույթում հաղթել է «Worley Parsons» ավստրալական ընկերությունը, որի գնային առաջարկն էր 459,7 մլն. դոլար:
ՀՀ կառավարությունը դեկտեմբերի 4-ին հավանություն է տվել ռուսական «Ատոմստրոյէքսպորտ» ընկերության հետ հայ-ռուսական համատեղ ընկերության ստեղծման մասին որոշմանը՝ նոր ատոմային էներգաբլոկի շինարարության համար, 60 մլն դրամ կանոնադրական կապիտալով (շուրջ 156 հազար դոլար):
Ներկայումս բանակցություններ են ընթանում նախագծում ռուսական մասնաբաժինը որոշելու համար:
Նախարարի խոսքերով՝ աշխատանքները շարունակվում են, մասնավորապես, տուրբինային կղզու հետազոտման և ավտոմատ կառավարման համար սարքավորումների, ինչպես նաև համապատասխան պայմանագրերի ստորագրման գծով:
«Աշխատանքներն արդեն սկսված են և իրականացվում են տարեսկզբին հաստատված գրաֆիկի համաձայն, և այսօրվա դրությամբ ծրագրված ժամկետների խախտման հետ կապված խնդիրներ չկան»,- ասաց նա:
Հայաստանը նախատեսում է ԱԷԿ նոր բլոկ կառուցել՝ մոտավորապես 1000 ՄՎտ հզորությամբ, և այս նախագիծը կարժենա մոտ 5 մլրդ. դոլար։ Այս նախագծի իրականացման համար արտասահմանյան կապիտալ ներգրավելու նպաատկով 2006թ. ՀՀ խորհրդարանն օրենսդրությամբ անվավեր ճանաչեց նոր ատոմային բլոկների պետական մենաշնորհի իրավունքը։ Շինարարական աշխատանքները նախատեսված է սկսել 2011թ.-ին:
Մեծամոր քաղաքում գործող հայկական ԱԷԿ-ը շահագործման է հանձնվել 1976-ին։ Ներկայում գործում է կայանի միայն երկրորդ բլոկը՝ 407,5 ՄՎտ հզորությամբ, որն արտադրում է Հայաստանի ողջ էլեկտրաէներգիայի 40-ից մինչև 50%-ը։
ԱԷԿ-ի ֆինանսական հոսքերը 2003-2013թթ. հանձնված են «ԻՆՏԵՐ ՌԱՈ ԵԷՍ» ՓԲԸ-ի հավատարմագրային կառավարմանը, որի սեփականատերը ռուսական «Ռոսատոմ» պետական կորպորացիան է։ Հայկական ԱԷԿ-ը, մասնագետների գնահատականներով, կարող է գործել մինչև 2016թ.-ը:-0-
