Բաքվում տեղի ունեցած ջարդերի քսանամյա տարելիցը պետք է պետական մակարդակով նշվի. Ժառանգություն

«Ժառանգություն» հայկական ընդդիմադիր խմբակցությունը կոչ է անում կառավարությանը 2010թ.-ին պետական մակարդակով նշել Բաքվում տեղի ունեցած ջարդերի 20-ամյա տարելիցը, երեքշաբթի լրագրողներին ասաց «Ժառանգություն» ընդդիմադիր խմբակցության քարտուղար Լարիսա Ալավերդյանը:

1990թ. հունվարի 13-ին Բաքվում սկսվեցին հայերի ջարդերը, որոնք տևեցին 7 օր: Հայերին ոչնչացնելու նպատակաուղղված քաղաքականության արդյունքում Բաքվում բնակվող շուրջ 300 հազար հայերը լքեցին քաղաքը: Ըստ Human Rights Watch-ի զեկուցող Ռոբերտ Քուշենի, «ջարդերը տարերային չէին, քանի որ ջարդարարներն ունեին հայերի ցուցակներն ու նրանց հասցեները: Ջարդերը շարունակվեցին այնքան ժամանակ, մինչև Բաքու մտավ խորհրդային զորքը:

«Բաքվում տեղի ունեցած աննախադեպ ջարդերն ուղղված էին ոչ թե մարդկանց որևէ կատեգորիայի, այլ ողջ ժողովրդի դեմ», - ասաց Ալավերդյանը:

Պատգամավորը կարծում է, որ պետական մակարդակով միջոցառումների անցկացումը մեծ նշանակություն և հրատապություն ունի, քանի որ ցեղասպանության հարցն առանձին վերցված իրողություն չէ: «Դա 1915թ.-ին Թուրքիայում տեղի ունեցած հայերի ջարդի շարունակությունն է, և այդ երկու իրողություններն իրենց կարգավիճակով նույն են», - ասաց Ալավերդյանը:

«Հասարակությունը պետք է մեկ կարծիք ունենա ազգի և մարդկության դեմ հանցագործությունների հարցի նկատմամբ: Մենք մտադիր ենք դիմել կառավարությանը, որպեսզի այդ ողբերգական իրադարձությունները, որոնք իրականացվել են բռնապետ, ցեղասպան պետության կողմից, իրենց գնահատականը ստանան պետական մակարդակով», - ասաց Ալավերդյանը:-0-