Հայ-թուրքական սահմանի բացումը բխում է երկու երկրի զբոսաշրջության ոլորտի շահերից, կարծում է Ճամփորդական գործակալների ամերիկյան միության հայաստանյան ներկայացուցչության նախագահ, «Five stars travel» կազմակերպության տնօրեն Եղիշե Թանաշյանը:
«Սահմանի բացումը թույլ կտա Թուրքիա այցելող մարդկանց պատմամշակութային զբոսաշրջության նպատակներով այցելել նաև Հայաստան՝ շրջանցելով Վրաստանը, իսկ հայ զբոսաշրջիկների համար ավելի գրավիչ կդառնա Թուրքիայում հանգիստ անցկացնելը», - ասել է նա:
Թանաշյանը նշել է, որ Արևելյան Թուրքիա այցելող զբոսաշրջիկներին հիմնականում հետաքրքրում են հայկական մշակութային հուշարձանները, և նրանք կնախընտրեն նաև այցելել Հայաստան: Նա ավելացրել է, որ այժմ նման ցանկություն ունեցող զգոսաշրջիկները ստիպված են զբոսաշրջության շրջանակներում մի քանի օր անցկացնել Վրաստանում, իսկ սահմանի բացումից հետո նման անհրաժեշտություն չի լինի:
Հայաստանի և Թուրքիայի՝ մինչև վերջին ժամանակները բավականին լարված հարաբերությունները սկսեցին կարգավորվել, երբ երկու երկրի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-
