Հայ-թուրքական արձանագրությունները բուռն քննարկումների կարժանանան ՀՀ ՍԴ-ում և ԱԺ-ում. պատգամավոր
Հայ-թուրքական արձանագրություններին բուռն քննարկումներ են սպասվում Հայաստանի Սահմանադրական դատարանում և խորհրդարանում, կարծում է ՀՀ ԱԺ արտաքին հարաբերությունների մշտական հանձնաժողովի նախագահ, ՀՅԴ Գերագույն մարմնի ներկայացուցիչ Արմեն Ռուստամյանը:
«Հայ-թուրքական արձանագրությունները շուտով քննարկումներ կանցնեն մեր հանձնաժողովում:Մենք նախաստորագրված արձանագրությունների շուրջ արդեն կազմակերպել ու անցկացրել ենք խորհրդարանական լսումներ, որոնց արդյունքում հարուստ նյութ է հավաքվել»,- ասաց Ռուստամյանը երկուշաբթի մամուլի ասուլիսի ժամանակ:
Նրա խոսքերով, հավաքված նյութի հիման վրա հայ-թուրքական արձանագրությունները քննարկման փուլ կանցնեն խորհրդարանական հանձնաժողովում:
Ընդ որում Ռուստամյանը հրաժարվեց կանխատեսումներ անել ՀՀ ՍԴ եզրակացության վերաբերյալ, որը 2010 թ.-ի հունվարին պետք է նիստ անցկացնի ու քննարկի արձանագրությունների սահմանադրական լինելու հարցը:
«Ես այժմ չեմ ուզում որևէ արդյունք կանխատեսել, բայց կարծում եմ, որ արձանագրությունների առնչությամբ քննարկումները դատարանում և խորհրդարանում բավականին բուռն կլինեն»,- ասաց նա:
Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ հայոց ցեղասպանության միջազգային ճանաչման գործընթացին:-0-
