Ճգնաժամը լավ է ազդում թատերական արվեստի վրա

ԵՐԵՎԱՆ, 18  դեկտեմբերի. /Նովոստի-Արմենիա/. Ճգնաժամը լավ է ազդում թատերական արվեստի վրա, ընդ որում դա միայն Հայաստանին չի վերաբերում, այլ ողջ աշխարհին, ասաց թատրոնի տնօրեն և գեղարվեստական ղեկավար, ՀՀ արվեստի վաստակավոր գործիչ Ռուբեն Բաբայանը: 

«Մարդիկ ավելի շատ ազատ ժամանակ են ունենում, քանի որ չունեն աշխատանք և փորձում են ազատվել սեփական հոգսերից»,- ասաց նա ուրբաթ մամուլի ասուլիսի ժամանակ:

Խոսելով անցնող տարում թատրոնի ձեռքբերումների մասին՝ Բաբայանը նշեց, որ Երևանի պետական տիկնիկային թատրոնը 2009թ.-ին 7 նոր ներկայացում է բեմադրել:

«Շատերը երևի գիտեն, որ թատրոնում բեմադրվում են ոչ միայն տիկնիկային, այլ դրամատիկական ներկայացումներ և շոու-մնջախաղեր, ընդ որում ոչ միայն երեխաների, այլև մեծահասակների համար»,- ասաց նա՝ հավելելով, որ երիտասարդ սերնդին բեմում ուժերը փորձելու հնարավորություն է տրվում:

Գեղարվեստական ղեկավարը ասաց նաև, որ մեկ տարվա ընթացքում բեմադրվել է 450 ներկայացում, որոնց այցելել է 60 հազար հանդիսատես:

Բացի այդ, Բաբայանի խոսքերով, թատրոնը հովանավորել է մի քանի միջազգային փառատոներ, այդ թվում թատերական HighFest-ը, «Ոսկե Ծիրան» կինոփառատոնը և այլն:

«Թատրոնն այս տարի մասնակցել է երեք միջազգային փառատոնի, այդ թվում «ԿուկԱրտ» 9-րդ միջազգային փառատոնին Սանկտ Պետերբուրգում, որի շրջանակներում ներկայացրել է Գոգոլի «Շինելի» մոտիվներով «Ակակ» բեմադրությունը»,- պարզաբանեց նա:  

Տնօրենն ասաց նաև, որ այդ նույն ներկայացումը մասնակցել է «Երեքը շատ է, երկուսը՝ քիչ» փառատոնին Պլովդիվում, սակայն այն պատճառով, որ այն չէր համապատասխանում մրցույթի պահանջներին, ընթանում էր արտամրցութային ծրագրով, իսկ HighFest փառատոնին թատրոնը ներկայացնում էր 4 բեմադրություն: -0-