Հայաստանն ու Ղարաբաղը ղարաբաղյան հակամարտության խաղաղ կարգավորման ամենաշահագրգիռ կողմերն են. ՀՀ ԱԳՆ

ԵՐԵՎԱՆ, 18 դեկտեմբերի. /Նովոստի-Արմենիա/. Հայաստանի Հանրապետության արտաքին գործերի նախարար Էդվարդ Նալբանդյանը հայտարարել է, ո Հայաստանն ու Ղարաբաղը ղարաբաղյան հակամարտության խաղաղ կարգավորման ամենաշահագրգիռ կողմերն են:

«Հայաստանն ու Ղարաբաղը ղարաբաղյան հակամարտությունը բանակցությունների ճանապարհով խաղաղ կարգավորելու ամենաշահագրգիռ կողմերն են»,- ուրբաթ թուրք լրագրողների հետ հանդիպման ժամանակ ասել է Նալբանդյանը:

Միաժամանակ նախարար հիշեցրեց, որ Հայաստանն ու Ղարաբաղը չեն, որ մշտապես ռազմատենչ հայտարարություններ են անում ամենաբարձր մակարդակով անցկացվող հանդիպումներից տառացիորեն մի քանի ժամ առաջ:

«Ինչի՞ համար է դա արվում: Միգուցե հանդիպումը խանգարելու համար, որպեսզի ցույց տրվի, թե բանակցությունները տապալվել են, օգտագործել հնարավորությունները հայ-թուրքական կարգավորմանը խոչընդոտելու համար»,- լրագրողներին դիմեց Նալբանդյանը:

Նա ընդգծեց նաև, որ ղարաբաղյան հակամարտությունը հայ-թուրքական հարաբերություններին կապելը հայ-թուրքական գործընթացի խոչընդոտներից մեկն է:

Նախարարի խոսքով, վերապահումներ հնարավոր են բազմակողմ փաստաթղթերում, սակայն երկկողմ համաձայնագրերում դրանք նշանակում են նահանջել պայմանավորվածություններից:

«Պատասխանատու ղեկավարները չեն կարող ինչ-որ հարցերի ու խնդիրների գերի լինել, չեն կարող չգնալ իրենց երկրի, ժողովրդի, տարածաշրջանի ու ապագա սերնդի շահերից բխող հարցերի լուծման»,- ասաց Նալբանդյանը՝ ավելացնելով, որ չնայած բոլոր դժվարություններին՝ անհրաժեշտ է շարունակել այդ ուղին:-0-