Երևանը հույս ունի, որ հայ-թուրքական արձանագրությունները կվավերացվեն խելամիտ ժամկետներում. ԱԳՆ

ԵՐԵՎԱՆ, 18 դեկտեմբերի. /նովոստի-Արմենիա/. ՀՀ արտգործնախարար Էդվարդ Նալբանդյանը նշել է, թե Երևանը հույս ունի, որ հայ-թուրքական արձանագրությունները կվավերացվեն խելամիտ ժամկետներում:

«Մենք արձանագրությունները ստորագրեցինք, որպեսզի վավերացվեն ու իրականացվենք դրանք, և ընթանանք դեպի երկու երկրի միջև հարաբերությունների կարգավորման»,- թուրք լրագրողների հետ հանդիպմանն ասաց արտգործնախարարը:

Նրա խոսքով, այդ գործընթացը հնարավոր չէր սկսել և, չնայած դժվարություններին, հասնել ստորագրման փուլին, եթե  չլիներ երկու կողմի ցանկությունն ու քաղաքական կամքը:

«Այսօր մենք ստորագրված փաստաթղեր ունենք և հուսանք, որ այդ արձանագրությունները կվավերացվեն խելամիտ ժամկետում: Խելամիտ ժամկետ է նշանակում այն, որ կողմերից որևէ մեկը արհեստական խնդիրներ, դժվարություններ, խոչընդոտներ չի ստեղծի, նախապայմաններ առաջ չի քաշի»,- ասաց Նալբանդյանը:

Նրա խոսքով, եթե կողմերից մեկը փորձի խանգարել գործընթացը և խոչընդոտներ ստեղծի, ապա փաստացիորեն, չի հարգի ձեռք բերված պայմանավորվածությունները ոչ միայն միմյանց, այլև միջազգային կառույցների հանդեպ:

«Բացի քաղաքական կամքից, առանց որի արձանագրությունները չէին ստորագրվի, կարևոր էր նաև միջազգային հանրության աջակցությունն այս գործընթացին: Ամբողջ աշխարհն էր աջակցում և աջակցում է այս գործընթացին և ակնկալում է, որ Հայաստանն ու Թուրքիան շուտափույթ կերպով կվավերացնեն և կիրականացնեն ձեռք բերված պայմանավորվածությունները»,- ասաց Նալբանդյանը:

Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»:

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։ Հարաբերությունները բարդացան, երբ Անկարան սկսեց սատարել ադրբեջանական դիրքորոշմանը՝ ղարաբաղյան հարցում, և երբ Թուրքիան կտրուկ արձագանքեց Օսմանյան կայսրությունում 1915թ. հայոց ցեղասպանության միջազգային ճանաչման գործընթացին:-0-