ՀՀ նախագահը կրթական բարեփոխումների մասին է խոսել բուհերի ռեկտորների հետ

ԵՐԵՎԱՆ, 16  դեկտեմբերի. /Նովոստի-Արմենիա/. Անհրաժեշտ է համապարփակ մոտեցում ցուցաբերել ուսանողներին մասնագիտական ժամանակակից տեխնիկական բազայով ապահովելու հարցում, ասել է նախագահ Սերժ Սարգսյանը պետական բուհերի ռեկտորների հետ այսօր կայացած հանդիպման ժամանակ, «Նովոստի-Արմենիա» գործակալությանը հայտնեցին հայկական պետության ղեկավարի մամուլի ծառայությունից:

Նախագահ Սարգսյանը նշել է, որ նման հանդիպումները պարբերական բնույթ են կրելու: Կարևորելով կրթության որակի բարձրացումը` նա ընդգծել է. «Ձեր, Ձեր ղեկավարած բուհերի գործունեությամբ է պայմանավորված, թե վաղը մենք ինչ մասնագետներ ենք ունենալու, ինչպիսին է լինելու մեր երկրի ապագան»:

Խոսելով բուհական կրթության հիմնական խնդիրների ու անելիքների մասին, ռեկտորները պետության ղեկավարին են ներկայացրել կրթության որակի բարձրացման, կառավարման համակարգի կատարելագործման և ժամանակակից պահանջներին դրա համապատասխանեցման ուղղությամբ ընթացող աշխատանքները:

Հաղորդագրության համաձայն, մասնավորապես, խոսվել է Հայաստանի` Բոլոնիայի գործընթացին միանալու, կրթական երկաստիճան և կրեդիտային համակարգերի ներդրման ընթացքում ի հայտ եկած խնդիրների և դրանց լուծման ուղիների մասին:

Քննարկվել են նաև բուհերի կազմակերպաիրավական կարգավիճակի, մասնավոր բուհերի գործունեության, օտարերկրյա քաղաքացիների ուսումնառության գործընթացի կազմակերպման հետ կապված հարցեր:

Կրթության և գիտության նախարար Արմեն Աշոտյանը ներկայացրել է ոլորտի զարգացման հիմնական գերակայություններից բխող քայլերի իրականացման ներկա ընթացքը:

Սերժ Սարգսյանը հետաքրքրվել է նաև ուսուցման նոր տեխնոլոգիաների կիրառման, ուսումնական լաբորատորիաների արդիականացման գործընթացով:

Նախագահ Սարգսյանը նաև ասել է, որ ռեկտորներից ակնկալում է դինամիկ, նախաձեռնողական և նպատակաուղղված աշխատանք` բուհական բարեփոխումներն արդյունավետ առաջ տանելու համար:-0-