Հայաստանի պաշտպանության նախարարը ստուգել է ՀՕՊ ուժերի պատրաստականությունը
Հայաստանի պաշտպանության նախարար Սեյրան Օհանյանը նախորդ կիրակի աշխատանքային այցով եղել է ՀՀ ԶՈՒ ՀՕՊ զորամասերից մեկի զենիթահրթիռային երկու դիվիզիոններում, տեղեկացնում է Հայաստանի պաշտպանության նախարարության մամուլի ծառայությունը։
«Չնայած ստորաբաժանումների անձնակազմերը զբաղված էին կիրակնօրյա միջոցառումների անցկացմամբ, այնուամենայնիվ, նրանց մարտական պատրաստականության վիճակը ստուգելու նպատակով տրվել է համար առաջին պատրաստականության ազդանշան: Մարտական հաշվարկների անձնակազմերը հաշված րոպեների ընթացքում զբաղեցրել են իրենց հաստիքային տեղերը, և տեխնիկան բերվել է մարտական վիճակի»,- ասվում է հաղորդագրությունում։
Զրուցելով զինվորների հետ և գոհունակություն հայտնելով ՀՕՊ մարտական պատրաստականության վերաբերյալ` նախարարը նշել է, որ ցանկացած զինվոր պետք է խորապես ըմբռնի իր գործի ու ծառայության կարևորությունը, առաջնորդվի իր հայրենիքը պաշտպանելու վեհ գաղափարով:
Դիվիզիոններում պաշտպանության նախարարը ծանոթացել է նաև զինծառայողների սոցիալ-կենցաղային պայմաններին, դիվիզիոնների շրջանակներում իրականացվող մարտական հերթապահության արդյունքներին:
Պաշտպանության նախարարն անձնակազմերին հանձնել է խրախուսական նվերներ։ -0-
