Դեկտեմբերի 14-ին Փարիզում աշխատանքային այցով գտնվող արտգործնախարար Էդվարդ Նալբանդյանն անցկացրեց Եվրոպական երկրներում և միջազգային կազմակերպություններում հավատարմագրված Հայաստանի դեսպանների և մշտական ներկայացուցիչների խորհրդակցությունը։
Ինչպես երեքշաբթի «Նովոստի-Արմենիա» գործակալությանը հայտնեցին հանրապետության ԱԳՆ մամուլի ծառայությունից, նախարար Նալբանդյանը Հայաստանի դիվանագիտական ներկայացուցչությունների ղեկավարներին ներկայացրեց Եվրոպական Միության հետ ծավալվող համագործակցությունը, հանձնարարականներ տվեց Եվրոպական կառույցներում ներգրավվածության առավել ակտիվացման և եվրոպական կազմակերպությունների հետ համագործակցության խորացման վերաբերյալ:
Խորհրդակցությանը անդրադարձ արվեց ընթացիկ տարվա սեպտեմբերին ՀՀ դիվանագիտական ներկայացուցչությունների ղեկավարների Երևանում կայացած ամենամյա խորհրդակցությանը Հանրապետության նախագահ Սերժ Սարգսյանի կողմից տրված հանձնարարականների կատարման ընթացքին:
Բացի այդ, խորհրդակցության մասնակիցները անդրադարձան նաև 2009 թվականի դեկտեմբերի 1-ին Աթենքում կայացած ԵԱՀԿ արտգործնախարարների խորհրդի 17-րդ նստաշրջանին և ընդունված փաստաթղթերին, ինչպես նաև դեկտեմբերի 8-ին Բրյուսելում ԵՄ Արեւելյան գործընկերության ԱԳ նախարարների հանդիպմանը:
Հայաստանի բարձրաստիճան դիվանագետները հանգամանալից քննարկեցին մի շարք տարածաշրջանային և միջազգային հարցեր:
Խորհրդակցությանը մասնակցեցին նաև Հայաստանի փոխարտգործնախարար Կարինե Ղազինյանը և ԱԳՆ աշխատակազմի ղեկավար Շահեն Ավագյանը։
Չորեքշաբթի Էդվարդ Նալբանդյանը կմասնակցի Ֆրանկոֆոնիայի միջազգային կազմակերպության արտգործնախարարների համաժողովին, որի ժամանակ նախատեսված է նաև Հայաստանի ԱԳ նախարարի ելույթը: -0-
