ԵՐԵՎԱՆ, 14 դեկտեմբերի. /Նովոստի-Արմենիա/. Նախագահ Սերժ Սարգսյանը, երկուշաբթի ընդունելով Հայաստանում Սլովակիայի նորանշանակ դեսպան Յոզեֆ Միգաշի /նստավայրը` Մոսկվա/ հավատարմագրերը՝ հայտարարել է, որ երկու երկրների միջև երկխոսության ակտիվացումը կնպաստի տնտեսական համագործակցության խորացմանը:
«Կարևորելով երկու երկրների միջև կանոնավոր շփումները, քաղաքական երկխոսության ակտիվացումը` նախագահն ընդգծել է, որ այն նպաստավոր հիմք է ստեղծում տնտեսության ու այլ բնագավառներում փոխգործակցության հետագա խորացման համար»,- հայտնում է պետության ղեկավարի մամուլի ծառայությունը:
Խոսելով երկկողմ առևտրատնտեսական կապերի մասին` նախագահ Սարգսյանը և դեսպանը համակարծիք են եղել, որ երկու երկրները դեռևս շատ անելիքներ ունեն դրանց զարգացման ուղղությամբ: Այդ առումով նրանք առաջնային են համարել իրավապայմանագրային դաշտի ընդլայնումը:
Դեսպան Միգաշը նշել է, որ Հայաստանը միշտ էլ աչքի է ընկել իր գիտական ներուժով, և իրենք շահագրգռված են այս ոլորտում գործակցության խորացմամբ:-0-
