Հայաստանը խնդիր չունի նոր Ատոմային էլեկտրակայանի կառուցման ծրագրի ֆինանսավորման առումով, քանի որ դրանով շահագրգռված են ինչպես մասնավոր հատվածի, այնպես էլ տարբեր պետությունների բազմաթիվ ներդրողներ, ասաց ՀՀ վարչապետ Տիգրան Սարգսյանը՝ պատասխանելով «Նովոստի-Արմենիա» գործակալության հարցին։
Հայաստանի կառավարությունը դեկտեմբերի 4-ին հավանություն է տվել 60 մլն դրամ (մոտ 156 հազար դոլար) կանոնադիր կապիտալով ատոմային նոր էներգաբլոկի կառուցման համար «Ատոմստրոյէքսպորտ» ռուսական ընկերության հետ համատեղ հայ-ռուսական ընկերության ստեղծման մասին որոշմանը։ Ներկայում բանակցություններ են տարվում նախագծում ռուսական մասնաբաժնի որոշման վերաբերյալ։
Ընդհանուր առմամբ, հայկական կառավարության ղեկավարի խոսքերով, կառուցման ծրագիրն իրականացվում է ժամանակացույցին համապատասխան, «և ճգնաժամը, կարծես, խոչընդոտ չէ այդ նախագիծն ամբողջ ծավալով իրագործելու համար»։
«Մենք ՌԴ վարչապետի հետ քննարկվեինք ոչ մեծ մասնաբաժինը Հայաստանում ազատ աճուրդի հանելու հնարավորությունը, որպեսզի քաղաքացիները կարողանան իրենց գումարները ներդնել ԱԷԿ արժեթղթերում և դառնալ դրա սեփականատերը։ Այդ հարցը քննարկել եմ նաև Կիրիենկոյի հետ, և նրան այդ գաղափարը նույնպես դուր է եկել, ինչպես և Պուտինին։ Այսպիսով, հետագայում մենք մտադիր ենք իրագործել դա»,- նախօրեին լրագրողներին ասաց Սարգսյանը՝ ամփոփելով դեպի Սանկտ-Պետերբուրգ՝ ԵվրԱզԷՍ-ի միջպետական խորհրդի կառավարությունների ղեկավարների 25-րդ նիստին մասնակցելու նպատակով կատարած այցը։
Սարգսյանը նշեց նաև, որ ռուս վարչապետի հետ զրույցի ընթացքում հաստատվեց, որ բոլոր պայմանավորվածություններն ուժի մեջ են։
«Ռուսաստանյան կողմը հետևում է նոր ԱԷԿ կառուցման ծրագրին, որն իրականացվում է «Worley Parsons» ընկերության՝ տվյալ ծրագրի օպերատորի միջոցով։ Մենք ունենք ռուս, եվրոպացի և ամերիկացի գործընկերների համաձայնությունը բիզնես-նախագծի վերաբերյալ, որն արդեն մշակված է «Worley Parsons»-ի կողմից»,- ասաց նա։
Ավստրալիական «Worley Parsons» ընկերությունը հաղթել է Հայաստանում ատոմային նոր էներգաբլոկի կառուցման և մոնտաժի կառավարման ընկերության ընտրության մրցույթում։ Ընկերության գնային առաջարկը կազմել է 459,7 մլն դոլար։
Այս կապակցությամբ վարչապետը պարզաբանեց, որ ԱԷԿ այն մոդելը, որն ընտրվել է Հայաստանում, Բուլղարիայի ԱԷԿ-ի նախագծի կրկնօրինակն է, որին մասնակցել են տարբեր երկրներ։
«Այդ բոլոր երկրները մեր նախագծին մասնակցելու հնարավորություն ունեն՝ շահագրգռված լինելով դրանով»,- ասաց Սարգսյանը։
Հայաստանը նախատեսում է ԱԷԿ նոր բլոկ կառուցել՝ մոտավորապես 1000 ՄՎտ հզորությամբ, և այս նախագիծը կարժենա մոտ 2 մլրդ դոլար։ Այս նախագծի իրականացման համար արտասահմանյան կապիտալ ներգրավելու նպատակով 2006թ. ՀՀ խորհրդարանն օրենսդրությամբ անվավեր ճանաչեց նոր ատոմային բլոկների պետական մենաշնորհի իրավունքը։ Շինարարական աշխատանքները ծրագրվում է սկսել 2011թ.-ի սկզբից։
Մեծամոր քաղաքում գործող հայկական ԱԷԿ-ը շահագործման է հանձնվել 1976-ին։ Ներկայում գործում է կայանի միայն երկրորդ բլոկը՝ 407,5 ՄՎտ հզորությամբ, որն արտադրում է Հայաստանի ողջ էլեկտրաէներգիայի 40-ից մինչև 50%-ը։
ԱԷԿ-ի ֆինանսական հոսքերը 2003-2013թթ. հանձնված են «ԻՆՏԵՐ ՌԱՈ ԵԷՍ» ՓԲԸ-ի հավատարմագրային կառավարմանը, որի սեփականատերը ռուսական «Ռոսատոմ» պետական կորպորացիան է։ Հայկական ԱԷԿ-ը, մասնագետների գնահատականներով, կարող է գործել մինչև 2016թ.-ը: -0-
