Հայաստանն օգտագործում է Լատվիայի փորձը իրացման եվրոպական շուկաներ մտնելու համար, հայտարարեց Հայաստանի էկոնոմիկայի նախարար Ներսես Երիցյանը հայ-լատվիական բիզնես-ֆորումի բացմանը, որին ներկա էին Հայաստանի և Լատվիայի նախագահներ Սերժ Սարգսյանը և Վալդիս Զատլերսը։
«Հայաստանն ու Լատվիան հնարավորություն ունեն միավորելու ջանքերը և մտնել մեծ շուկաներ։ Լատվիան կարող է աջակցել Հայաստանին եվրոպական շուկաների յուրացման հարցում, իր հերթին Հայաստանը կարող է կամրջի դեր կատարել Լատվիայի՝ մերձավորարևելյան շուկաներ մտնելու համար»,- ասաց նախարարը։
Նա նշեց, որ Հայաստանը կարևորում է Եվրամիության հետ հարաբերությունների զարգացումը, և այդ առումով Հայաստանի համար կարող է օգտակար լինել Լատվիայի փորձը։
«Մենք մտադիր ենք բանակցություններ վարել Եվրամիության հետ ազատ առևտրի համաձայնագրի առնչությամբ, և այդ առումով մենք կարևորում ենք բիզնես-միջավայրի և կարգավորման կատարելագործման բարելավման Լատվիայի փորձը»,- ընդգծեց Երիցյանը։
Նախարարն ավելացրեց, որ երկու երկրներն էլ ներկայում արդյունավետ ուղիներ են փնտրում համաշխարհային տնտեսական ճգնաժամի հետևանքների հաղթահարման համար։
«Ճգնաժամը նույնպես լավ հնարավորություն է տնտեսության ավելի մեծ դիվերսիֆիկացման համար։ Հատկապես նկատի առնելով, որ երկու երկրում էլ գերակա է համարվում անցումն ավանդական տնտեսությունից գիտելիքների վրա հիմնված տնտեսության»,- ավելացրեց նա։
Հայ-լատվիական համագործակցության գերակա ուղղությունների շարքում նախարարը նշեց տեղեկատվական տեխնոլոգիաները, դեղագործությունը, սննդի արդյունաբերությունը։
Հայաստանի և Լատվիայի միջև ապրանքաշրջանառությունը 2008 թվականին կազմել է 11,3 մլն դոլար, որից 1,17 մլն-ն կազմում է արտահանումը, իսկ 10,11 մլն-ը՝ ներմուծումը։ 2004-2008թթ. ապրանքաշրջանառությունը կազմել է 19,43 մլն դոլար։ Հայաստանից Լատվիա արտահանվող հիմնական ապրանքները ոգելից խմիչքներն են, քացախը, օպտիկան, իսկ ներկրվողները՝ երկաթուղային լոկոմոտիվներ, մսամթերք և ձկնամթերք։ -0-
