ՀՀ նախագահ Սերժ Սարգսյանը կարծում է, որ այսօր կան բոլոր նախադրյալները Հայաստանի և Լատվիայի միջև առևտրաշրջանառության աճի համար:
Այս մասին հայկական պետության ղեկավարը ուրբաթ հայտարարել է հայ-լատվիական բիզնես-ֆորումի բացման ժամանակ, որին մասնակցել է նաև Լատվիայի նախագահ Վալդիս Զատլերսը:
Սարգսյանի խոսքերով, լատվիական պատվիրակության՝ Հայաստանում լինելու երկու օրում քննարկվել են հայ-լատվիական տնտեսական համագործակցության հնարավորությունները՝ ուղղված ապրանքաշրջանառության աճի ապահովմանը:
«Վերջին տարիներին մենք երկու երկրների միջև ապրանքաշրջանառության կայուն աճ ենք գրանցել, սակայն վերջին տարում տեմպերի որոշակի իջեցում է նկատվում՝ պայմանավորված ֆինանսատնտեսական ճգնաժամով»,- ասաց ՀՀ նախագահը:
Միաժամանակ Սարգսյանը կարծիք է հայտնել, որ ենթադրաբար բիզնես-ֆորումի արդյունքում ստորագրվելիք պայմանագրերը զգալիորեն կնպաստեն ապրանքաշրջանառության աճին: Նրա խոսքերով, բիզնես-կապերի հաստատումը փոխադարձ օգուտ կբերի ճգնաժամի հետևանքների հաղթահարմանը:
«Բիզնես-ֆորումը լրացուցիչ պայմաններ կստեղծի արդյունաբերության, գյուղատնտեսության, տեխնիկայի, բանկային գործի ոլրտներում համագործակցության զարգացման համար»,- ասաց նախագահը:
Երկրի ղեկավարը նշեց, որ կա ողջ անհրաժեշտ պայմանագրային իրավական բազան` արդյունավետ գործընկերության կազմակերպման համար:
Նա հատկապես նշեց զբոսաշրջության ոլորտում համագործակցության զարգացման անհրաժեշտությունը՝ ասելով, որ Հայաստանն ու Լատվիան անցյալում զբոսաշրջության փոխանակման լավ ավանդույթներ են ունեցել, որոնք պետք է վերականգնել:
«Հայաստանը կարևորում է արտասահմանյան ներդրումները: իսկ ներդրումները հաջորդում են քաղաքական երկխոսության զարգացմանը: Կարծում եմ, մենք Լատվիայի հետ հարաբերություններում հասել ենք այդ գծին»,- ասաց Սարգսյանը:
Նախագահի խոսքով` Հայաստանը ոչ մի սահմանափակում չի սահմանում արտասահմանյան կապիտալի համար: «Պատահական չէ, որ դեռ ոչ մի խոշոր ներդրող չի լքել երկիրը: Ես անձամբ երաշխավորում եմ արտասահմանյան ներդրումների հուսալիությունը Հայաստանում»,- հավելեց նախագահը:
Հայաստանի և Լատվիայի միջև ապրանքաշրջանառությունը 2008 թ.-ին 11,3 մլն դոլար է կազմել, որից 1,17 մլն-ը արտահանումն է, իսկ 10,11 մլն-ը՝ ներկրումը: 2004-2008 թթ.-ին ապրանքաշրջանառությունը 19,43 մլն դոլար է կազմել: Հայաստանից Լատվիա արտահանվող հիմնական ապրանքներն են ալկոհոլային խմիչքները, քացախը, օպտիկան, իսկ ներկրվողները՝ երկաթուղային լոկոմոտիվները, մսեղենն ու ձկնեղենը: -0-
