Երևանի պետհամալսարանը շահագրգռված է լատվիացի գործընկերների հետ համագործակցության ընդլայնմամբ. ռեկտոր
ԵՐԵՎԱՆ, 10 դեկտեմբերի. /Նովոստի-Արմենիա/. Երևանի պետհամալսարանը շահագրգռված է գիտության և կրթության ոլորտներում Լատվիայի հետ համագործակցության ընդլայնմամբ, հինգշաբթի հայտարարեց ԵՊՀ ռեկտոր Արամ Սիմոնյանը Լատվիայի նախագահ Վալդիս Զատլերսի՝ բուհ կատարած այցի կապակցությամբ ողջույնի խոսքում:
«Եվրոպական կրթական տարածքում ինտեգրման հարցը ԵՊՀ-ի համար գերակա հարցերից է։ Մենք միմյանց հետ կիսելու բան ունենք կրթության միջազգայնացման ճանապարհին»,- ասաց Սիմոնյանը՝ նշելով տվյալ ուղղությամբ երկրների միջև համագործակցության և կրթության արդիականացման կարևորությունը:
Նա նշեց նաև, որ Լատվիայի նախագահի այցը Հայաստան կնպաստի երկու բարեկամ ժողովուրդների և պետությունների միջև հարաբերությունների զարգացմանն ու խորացմանը:
«Հայաստանի ապագան կախված չէ նրա աշխարհագրական դիրքից և ձեր հարևաններից։ Ես այն տեսնում են ձեր աչքերում»,- իր հերթին ասաց Զատլերսը՝ դիմելով բուհի ուսանողներին: Նա նշեց նաև հայկական գիտության և կրթության բազմադարյա ավանդույթները:
Երևանի պետական համալսարանի գիտխորհրդի որոշմամբ Վալդիս Զատլերսին շնորհվեց ԵՊՀ պատվավոր դոկտորի կոչում և բուհի «Ոսկե մեդալը»` հայ-լատվիական հարաբերությունների զարգացման գործում մեծ ներդրման համար:
Լատվիայի նախագահ Վալդիս Զատլերսը չորեքշաբթի եռօրյա պետական այցով ժամանել է Հայաստան` նախագահ Սերժ Սարգսյանի հրավերով: -0-
