ԵՐԵՎԱՆ, 10 դեկտեմբերի. /Նովոստի-Արմենիա/. A/H1N1 վիրուսով («խոզագրիպ») հիվանդների թիվը ներկայումս հասել է 54-ի, հինգշաբթի հայտարարեց Հայաստանի գլխավոր ինֆեկցիոնիստ Արա Ասոյանը:
Նրա խոսքերով` ներկայումս «Նորք» ինֆեկցիոն հիվանդանոցում ստացիոնար բուժման է գտնվում 59 հիվանդ, որոնցից 15-ի մոտ խոզագրիպի ախտորոշումը հաստատվել է, ընդ որում հիվանդներից 26-ը երեխաներ են:
Միաժամանակ Ասոյանն ասաց, որ շնչառական սուր վիրուսային հիվանդությունների անկումը Հայաստանում կարելի է կանխատեսել արդեն դեկտեմբերի կեսերին:
«Ժամանակին և օպերատիվ ձեռնարկված քայլերը հիմք են տալիս շնչառական սուր վիրուսային հիվանդությունների տարածման նվազում կանխատեսել Հայաստանում արդեն դեկտեմբերի 12-13-ը»,- ասաց նա:
Վերջին ամսվա ընթացքում Հայաստանում արձանագրվել է սեզոնային գրիպի և շնչառական սուր վիրուսային ինֆեկցիայի 31467 դեպք:
Իր հերթին Հայաստանի առողջապահության նախարարության բժշկական օգնության ցուցաբերման կազմակերպման վարչության պետ Վահան Պողոսյանը նշեց, որ, խուճապի կարիք չկա:
Առողջապահության նախարարության կողմից ձեռնարկվել և ձեռնարկվում են անհրաժեշտ բոլոր միջոցները հիվանդությունների տարածումը կանխելու համար:
«Հայաստանի առողջապահության նախարարությանն առընթեր ստեղծվել և գործում է օպերատիվ շտաբ առողջապահության նախարարի գլխավորությամբ, ուր օրը երկու անգամ ներկայացվում են ամբողջ հանրապետության բոլոր տվյալները և համապատասխան քայլեր են ձեռնարկվում»,- ասաց Պողոսյանը:
Բացի այդ, նրա խոսքերով, այսուհետ Հայաստանի առողջապահության նախարարությանն առընթեր գործում է թեժ գիծ արդեն երկու հեռախոսահամարներով՝ 52-88-72 և 56-53-23, որոնք աշխատում են շուրջօրյա և որոնցով քաղաքացիներն արդեն կարող են ստանալ հետաքրքրող ցանկացած տեղեկատվություն առողջության հետ կապված հարցերով:
Պողոսյանը հավաստիացրեց, որ AH1/N1 գրիպը ոչնչով չի տարբերվում սովորական սեզոնային գրիպից և հիգիենայի տարրական կանոնների պահպանման, ինչպես նաև սեփական առողջության նկատմամբ հոգատար վերաբերմունքի, ժամանակին բժիշկի դիմելու դեպքում անհանգստության կարիք չի լինի: -0-
