Ղարաբաղյան հիմնահարցը հայ-թուրքական հարաբերությունների հետ կապելու Թուրքիայի փորձերը սկզբից ևեթ ձախողման են դատապարտված, ասաց ՀՀ նախագահ Սերժ Սարգսյանը լատվիացի իր գործընկեր Վալդիս Զատլերսի հետ համատեղ մամուլի ասուլիսի ժամանակ:
«Հայաստանը պատրաստ է ինչպես հարկն է կատարել իր միջազգային պարտավորությունները և վավերացնել ստորագրված արձանագրությունները: Նույնը մենք ակնկալում ենք նաև Թուրքիայից, բայց եթե Թուրքիան սկսի ձգձգել արձանագրությունների վավերացումը, ապա Հայաստանը անհապաղ կօգտվի միջազգային իրավունքներից բխող հնարավորություններից»,- ասաց նախագահը:
Սարգսյանը նշեց, որ ինքն արդեն ՀՀ համապատասխան պետմարմիններին ուղղումներ պատրաստելու ցուցումներ տվել է օրենսդրության այն մասով, որը վերաբերում է միջազգային պայմանագրերի ստորագրմանը, վավերացման և անվավեր ճանաչմանը:
«Հայտարարում եմ, որ որքան շատ ձգվի գործընթացը, այնքան ավելի շատ խոչընդոտներ կծագեն հայ-թուրքական հարաբերությունների կարգավորման ճանապարհին»,- ասաց հայկական պետության ղեկավարը:
Թուրքիայի վարչապետն իր ամերիկացի գործընկեր Բարաք Օբամայի հետ Վաշինգտոնում ունեցած հանդիպումից հետո ասել էր, որ Հայաստանի և Թուրքիայի միջև հարաբերությունների բարելավումը կախված է ԵԱՀԿ Մինսկի խմբի կողմից ղարաբաղյան հակամարտության կարգավորումից:
Հայաստանի ու Թուրքիայի արտգործնախարարներ Էդվարդ Նալբանդյանն ու Ահմեդ Դավութօղլուն հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:
Հայաստանի և Թուրքիայի միջև չկան դիվանագիտական հարաբերություններ՝ Թուրքիայի կողմից առաջ քաշված նախապայմանների պատճառով։ Թուրքիան երկկողմ հարաբերությունների հաստատման համար առաջ է քաշում մի շարք նախապայմաններ, մասնավորապես, Հայաստանի կողմից Օսմանյան Թուրքիայում 1915թ. իրագործված Ցեղասպանության ճանաչմանն ուղղված ջանքերից հրաժարվելը, ղարաբաղյան հիմնախնդրի լուծումը` հօգուտ Ադրբեջանի, ինչպես նաև Հայաստանի կողմից Թուրքիայի սահմանների ճանաչումը:
Անկարայի նախաձեռնությամբ, 1993թ.-ից փակ է հայ-թուրքական սահմանը, ինչի հետևանքով Հայաստանի տնտեսությանը տարեկան 500 մլն դոլարի վնաս է հասցվում։--0--
