Բավականին լուրջ հավանականություն կա, որ Թուրքիան կվավերացնի հայ-թուրքական արձանագրությունները 2010 թ.-ի փետրվարի երկրորդ կեսին կամ մարտին, «Նովոստի-Արմենիա» գործակալությանը տված բացառիկ հարցազրույցում ասաց «Կովկասի ինստիտուտի» տնօրեն տնօրեն Ալեքսանդր Իսկանդարյանը:
«Չնայած Թուրքիայի ներսում առկա լուրջ հակազդեցություններին` հայ-թուրքական արձանագրությունների վավերացման հավանականությունը բավականին մեծ է»,- ասաց նա:
Մեկնաբանելով Թուրքիայի վարչապետ Ռեջեփ Թայիպ Էրդողանի պաշտոնական հայտարարությունը, համաձայն որի թուրք-հայկական հարաբերությունները չի հաջողվի կարգավորել առանց Ղարաբաղյան հակամարտության լուծման, Իսկանդարյանը նշեց, որ «հայ-թուրքական հարաբերությունների նորմալացումը Ղարաբաղյան հիմնահարցի հետ կապելը իրավաբանական առումով անհնարին է»:
«Թուրքիայի խորհրդարանը կարող է վավերացնել կամ չվավերացնել արձանագրություններն այն տեսքով, որով դրանք ստորագրվել են երկու երկրների գոևրծադիր իշխանության ներկայացուցիչների կողմից, իսկ փաստաթղթերում որևէ փոփոխություն կամ լրացում մտցնելը իրավաբանական տեսակետից անհնարին է»,- նշեց նա:
Միևնույն ժամանակ մեկնաբանելով թուրք քաղաքական գործիչների՝ այս երկու միմյանց հետ կապ չունեցող գործընթացների շաղկապումը ենթադրող հայտարարությունները` Իսկանդարյանը նշեց, որ նման քաղաքականությունը թելադրվում է արձանագրությունները խորհրդարանով «անցկացնելու» անհրաժեշտությամբ:
«Հարկ է հաշվի առնել նաև, որ արձանագրությունների վավերացման դեմ հանդես եկող հասարակական բողոքի կողքին Թուրքիայում կա նաև հակազդեցության մեկ այլ լուրջ գործոն՝ Ադրբեջանը, որը ճիշտ այնպիսի քաղաքական գործոն է Թուրքիայի համար, ինչպես սփյուռքը Հայաստանի համար»,- ասաց փորձագետը:
Միաժամանակ Թուրքիայի ԱԳՆ ղեկավար Ահմեդ Դավութօղլուն դեկտեմբերի 1-ին իր ադրբեջանցի գործընկեր Էլմար Մամեդյարովի հետ հանդիպման ժամանակ Աթենքում ԵԱՀԿ ԱԳՆԽ նիստի շրջանակներում հայտարարեց, որ հայ-թուրքական արձնագրությունների վավերացումը հնարավոր է միայն Հայաստանի կողմից ադրբեջանական տարածքների ազատագրումից հետո: -0-
