Հայաստանը չի հանդուրժի որևէ նախապայման Թուրքիայի հետ հարաբերությունների նորմալացման գործընթացում. պատգամավոր

Հայաստանը չի հանդուրժի որևէ նախապայման Թուրքիայի հետ հարաբերությունների նորմալացման գործընթացում, երեքշաբթի Ազգային ժողովում հայտարարեց Հայաստանի Հանրապետական կուսակցության (ՀՀԿ) խորհրդարանական խմբակցության քարտուղար Էդուարդ Շարմազանովը։

«Հայաստանի դիրքորոշումը Թուրքիայի հետ հարաբերությունների հարցում հստակ է և անփոփոխ, և մենք չենք հարդուրժի որևէ նախապայման»,- ասաց Շարմազանովը։

Տվյալ առումով պատգամավորը հետաքրքիր համարեց Թուրքիայի վարչապետ Ռեջեփ Թայիպ Էրդողանի հայտարարությունը, որն արվել է նախօրեին Վաշինգտնում, որտեղ նա հրապարակավ ընդունել է, որ հայ-թուրքական արձանագրություններում նախապայմաններ չկան։

«Ինչ վերաբերում է թուրքական քաղաքական վերնախավի մի շարք ներկայացուցիչների ոչ կառուցողական դիրքորոշմանը, ապա հարկ է նշել, որ նմանատիպ հայտարարություններ արվել են դեռևս հայ-թուրքական արձանագրությունների ստորագրումից առաջ և շարունակվում են արդեն դրանից հետո»,- ասաց Շարմազանովը։

Միաժամանակ նա նշեց, որ պետությունների հիմքը ստորագրված փաստաթղթերն են, ոչ թե հայտարարությունները։

«Եթե թուրք քաղաքական գործիչները ցանկանում են առիթի դեպքում կամ առանց դրա հիշել Ղարաբաղն, ապա ցանկանում եմ հիշեցնել նրանց հայտնի արևելյան ասացվածքն այն մասին, որ «անընդհատ «հալվա» ասելով՝ բերանը չի քաղցրանում»»,- ասաց Շարմազանովը։

Հայաստանի ու Թուրքիայի արտգործնախարարները հոկտեմբերի 10-ին Ցյուրիխի համալսարանում ստորագրեցին «Դիվանագիտական հարաբերությունների հաստատման մասին արձանագրությունը» և «Երկկողմ հարաբերությունների զարգացման մասին արձանագրությունը»: Փաստաթղթերը ստորագրումից հետո պետք է հավանության արժանանան երկու երկրների խորհրդարանների կողմից:--0—