Հայ-նորվեգա-ֆրանսիական համատեղ «Խճճված զուգահեռներ» ֆիլմը կնոջ լավագույն դերի համար մրցանակի է արժանացել Օրենբուրգում անցկացված «Արևելք-Արևմուտք» միջազգային կինոփառատոնում, ասել է «Parallels film production» ընկերության հիմնադիր, «Խճճված զուգահեռներ» ֆիլմի ռեժիսոր և պրոդյուսեր Հովհաննես Գալստյանը։
«Կնոջ լավագույն դեր» անվանակարգում մրցանակ է ստացել գլխավոր հերոսուհիներից մեկի՝ Լաուրայի դերը մարմնավորած Լորանս Ռիթերը։
«Խճճված զուգահեռներ» ֆիլմը, որը «Parallels film production» ընկերության առաջին լիամետրաժ ֆիլմն է, նկարահանվել է Հայաստանի Ազգային կինոկենտրոնի, նորվեգական Original Film և ֆրանսիական Quasar Pictures ընկերությունների մասնակցությամբ։ Ֆիլմի սյուժեն կառուցված է երկու կանանց՝ մոր և դստեր սիրո զուգահեռների վրա։ Կանանցից մեկը ֆաշիստամետ Նորվեգիայի բնակիչ է, ով թաքցրել է ճամբարից փախուստի դիմած մի խորհրդային զինվորի և նրա հետ եկել Հայաստան, իսկ երկրորդը ժամանակակից Երևանում ապրող մաթեմատիկայի 42-ամյա ուսուցչուհի է։
Գալստյանը հայտնեց, որ դստեր դերը մարմնավորած Լորանս Ռիթերը պրոֆեսիոնալ դերասանուհի չէ, և նրա հետ բավականին բարդ էր աշխատել։
«Նրա հետ հնարավոր էր միայն մեկ դուբլով աշխատել, և նրան նկարահանելու համար պետք էր մի փոքր նյարդայնացնել։ Նրան նախանշված էր այդ դերը, նա ինքն իրեն խաղաց՝ Լորանս Ռիթերը Լաուրայի դերում։ Հենց այդ պատճառով ես նրան ընտրեցի»,- երեքշաբթի ասաց նա «Նովոստի» միջազգային մամուլի կենտրոնում։
Նշելով, որ «Խճճված զուգահեռներ» ֆիլմը ցուցադրվել է նաև ԱՊՀ երկրների «Կինո. բաց սահմաններ» հանրաճանաչ ֆիլմերի միջազգային կինոփառատոնում, որը կազմակերպվել է «Սովէքսպորտֆիլմ» ընկերության կողմից, Գալստյանն ասաց, որ հենց այդ ֆիլմով բացվեց Ղազախստանի փառատոնը։
«Խճճված զուգահեռների» համաշխարհային պրեմիերան կայացել է 2009 թվականի հունիսին Մոսկվայի 31-րդ միջազգային կինոփառատոնի մրցութային ծրագրի շրջանակներում։ Կինոֆիլմի եվրոպական պրեմիերան կկայանա 2010 թվականին Ռոտերդամի 39-րդ միջազգային կինոփառատոնի պաշտոնական ծրագրի շրջանակներում։
Ռեժիսորը հայտնեց նաև, որ Հայաստանում ֆիլմի պաշտոնական վարձույթը կսկսվի 2010 թվականի գարնանը և նվիրված կլինի Կանանց միջազգային օրվան՝ մարտի 8-ին։
«Արևելք-Արևմուտք, դասականը և ավանգարդը» երկրորդ միջազգային կինոփառատոնն անցկացվել է Օրենբուրգում 2009 թվականի նոյեմբերի 23-28-ը։ Ներկայացված 10 ֆիլմերից միայն երեքն արժանացան ժյուրիի ուշադրությանը և մրցանակների։ Բացի «Խճճված զուգահեռներից» երկու մրցանակի արժանացավ «Թոմին դժոխքում» նորվեգական ֆիլմը, իսկ «Ոչ ոքի որդին» սլովենական ֆիլմը մրցանակ ստացավ «Տղամարդու լավագույն դեր» անվանակարգում։ -0-
