Հայաստանը շահագրգռված է Պարսից ծոցի երկրների հետ հարաբերությունների զարգացմամբ. նախագահ

Հայաստանը շահագրգռված է Պարսից ծոցի երկրների հետ հարաբերությունների զարգացմամբ, երկուշաբթի հայտարարեց ՀՀ նախագահ Սերժ Սարգսյանը Արաբական Միացյալ Էմիրությունների արտաքին գործերի պետնախարար Անվար Գարգաշի հետ հանդիպման ժամանակ:

Ինչպես «Նովոստի-Արմենիա» գործակալությանը հայտնեցին հայկական պետության ղեկավարի մամուլի ծառայությունից, Սարգսյանը  վստահություն է հայտնել, որ նրա այցը, ինչպես նաև վերջին ժամանակաշրջանում ակտիվացած բարձր մակարդակի այցելությունները  դրական դերակատարություն կունենան Հայաստանի ու Էմիրությունների միջև հարաբերությունների ամրապնդման գործում:

Գոհունակությամբ նշելով երկու երկրների դինամիկ զարգացող փոխգործակցությունը` Սերժ Սարգսյանն ասել է, որ Հայաստանը  շահագրգիռ է առավել ամրապնդել ու խորացնել կապերը Ծոցի երկրների հետ:

Հանրապետության նախագահը բարձր է գնահատել Արաբական Միացյալ Էմիրությունների զուսպ և հավասարակշիռ վերաբերմունքը մեր տարածաշրջանի զգայուն խնդիրների նկատմամբ:

Իր հերթին Անվար Գարգաշն, ընդգծելով  քաղաքական ու տնտեսական ոլորտում բարեկամ Հայաստանի հետ համագործակցությունն ընդլայնելու ԱՄԷ շահագրգռությունը, իր  հայաստանյան այցը և այստեղ ունեցած քննարկումները գնահատել է հաջողված:

Հիշելով, որ այսօր 1988թ. ավերիչ երկրաշարժի տարելիցի օրն է, պետնախարարն ասել է, որ իրենք երբեք չեն մոռանա այդ ողբերգական օրը, և իրենց կարեկցանքն են հայտնում հայ ժողովրդին:

Ծավալված զրույցի ընթացքում կողմերը մտքեր են փոխանակել բազմաբնույթ փոխգործակցության, համատեղ միջկառավարական հանձնաժողովի աշխատանքի, միջազգային կազմակերպություններում համագործակցության հետ կապված հարցերի շուրջ:-0-