Հայաստանի մանկապարտեզներում և դպրոցներում կարանտին հայտարարելու հարցը կորոշվի մինչև այսօրվա վերջը, երկուշաբթի լրագրողներին հայտնեց կրթության և գիտության նախարար Արմեն Աշոտյանը։
Նա նշեց, որ վերջին մի քանի օրվա ընթացքում երկրում շրջանառվում են մանկապարտեզների և դպրոցների փակման անհրաժեշտության վերաբերյալ լուրեր՝ գրիպի վիրուսի տարածման կապակցությամբ։
«Երկրում այսօր համաճարակաբանական իրավիճակը շատ տարբեր է, կան շրջաններ, որտեղ հաճախելիությունը շատ ցածր է, կան այնպիսիք, որտեղ փոփոխություններ ընդհանրապես չեն նկատվում։ Օրինակ՝ Լոռու մարզում չի արձանագրվել գրիպի ոչ մի դեպք, մինչդեռ Գեղարքունիքի մարզում արձանագրվել է հիվանդացության բարձր մակարդակ»,- ասաց Աշոտյանը։
Ինչպես նշեց նախարարը, մինչև օրվա վերջ նախարարությունը կամփոփի կրթական հաստատություններում հաճախելիության և հիվանդացության բոլոր տվյալներն, ինչը թույլ կտա վերջնական որոշում ընդունել այս հարցի վերաբերյալ։
Միաժամանակ նախարարը նշեց, որ կարանտինը չի վերաբերի բարձրագույն ուսումնական հաստատություններին։ Բացի այդ, նախարարի խոսքերով, օդերևութաբանների կանխատեսումներով՝ առաջիկայում երկրում կարող է ձյուն տեղալ, ինչը թույլ կտա փոխել ինֆեկցիոն իրավիճակը։
«Վերջնական որոշումը կընդունվի մինչև այսօրվա երեկո, սակայն արդեն որոշված է, որ կարանտինը կտևի մեկ շաբաթ, ինչը բավական է համաճարակաբանական իրավիճակը կոտրելու և վիրուսային ինֆեկցիայի տարածումը կանխելու համար»,- ասաց Աշոտյանը։
Ինչպես նշեց նախարարը, կարանտին հայտարարելու դեպքում արդեն երեկոյան այդ մասին կհայտարարվի հեռուստատեսությամբ, հակառակ դեպքում ուսումնական գործընթացը կշարունակվի մինչև վերջնական որոշման ընդունումը։ -0-
