Հայաստանի նախագահը մասնակցեց երկրաշարժի զոհերի հիշատակին նվիրված սգո արարողությանը

Հայաստանի նախագահ Սերժ Սարգսյանը մասնակցեց 1988 թվականի Սպիտակի երկրաշարժի զոհերի հիշատակին նվիրված սգո արարողությանը։

Պետության ղեկավարը փոխվարչապետ Արմեն Գևորգյանի, Շիրակի մարզպետ Լիդա Նանյանի, Գյումրիի քաղաքապետ Վարդան Ղուկասյանի, Հայաստանում Ռուսաստանի դեսպան Վյաչեսլավ Կովալենկոյի  ուղեկցությամբ ծաղկեպսակներ դրեց Գյումրիի Ամենափրկիչ եկեղեցու հարևանությամբ գտնվող երկրաշարժի անմեղ զոհերի հուշարձանին։ Այնտեղ տեղի ունեցավ նաև հոգեհանգստի արարողություն։

Դեկտեմբերի 7-ին լրանում է Սպիտակի ավերիչ երկրաշարժի 21-րդ տարելիցը: Տարերքի սարսափելի հարվածը հայ ժողովրդի պատմության ամենաողբերգական էջերից մեկը դարձավ:

1988թ. դեկտեմբերի 7-ին Հայաստանում տեղի ունեցավ ավերիչ երկրաշարժ։ Աղետը  հիմնովին ավերեց Հայաստանի հյուսիսում գտնվող երկու քաղաք՝ Սպիտակն ու Լենինանականը (այժմյան Գյումրին), ավելի քան հարյուր գյուղ։ Եվս մի քանի քաղաքներ  ավերվեցին մասամբ։

Երկրաշարժի 6-բալանոց գոտին ընդգրկել էր շուրջ 30.000 քառակուսի կիլոմետր տարածք, ստորգետնյա ցնցումները զգացվել էին Երևանում և Թբիլիսիում։

Այդ օրը, ըստ պաշտոնական տվյալների, զոհվեց 25 հազ. մարդ, 140 հազարը դարձան հաշմանդմաներ, իսկ կես միլիոն մարդ մնաց անօթևան։ --0--