Վրաստանում քանդված հայկական եկեղեցու վերականգնման աշխատանքները կսկսվեն 2010թ. գարնանը, հինգշաբթի մամուլի ասուլիսում հայտարարեց Պատմամշակութային արգելոց-թանգարանի և պատմական միջավայրի պահպանության ծառայության տնօրեն Սերժիկ Առաքելյանը։
«Նոյեմբերի վերջին Հայաստանի մշակույթի նախարարության մասնագետն այցելեց Թբիլիսի, ծանոթացավ իրավիճակին։ Ձեռք բերվեց պայմանավորվածություն, որ վերականգնողական աշխատանքներին կմասնակցեն Հայաստանից մեկնած մասնագետներ»,- ասաց նա։
Առաքելյանն ընդգծեց, որ եկեղեցու վերականգնման ֆինանսական ծախսերն ամբողջությամբ իր վրա կվերցնի վրացական կառավարությունը։
«Այդ գործընթացում մենք դրական միտում ենք նկատում և հույս ունենք, որ այդ դեպքը նախադեպ կդառնա հայկական և վրացական կողմերի հետագա համագործակցության համար Վրաստանի տարածքում հայկական պատմական հուշարձանների պահպանության գործում»,- ավելացրեց Առաքելյանը։
Թբիլիսիում նոյեմբերի 19-ին փլուզվել է 1356 թ.-ին կառուցված Սբ. Գևորգ հայկական եկեղեցին: Այս առնչությամբ Հայ առաքելական եկեղեցին և մի շարք հասարակական կազմակերպություններ լուրջ քննադատություն հնչեցրեցին հայկական եկեղեցիների և մշակույթի հուշարձանների պահպանության ուղղությամբ վրացական իշխանությունների անգործության առնչությամբ: Հայաստանում Վրաստանի նորանշանակ արտակարգ և լիազոր դեսպան Գրիգոր Տաբատաձեն ՀՀ Ազգային Անվտանգության խորհրդի քարտուղար Արթուր Բաղդասարյանի հետ հանդիպման ժամանակ հայտարարել էր, որ սբ. Գևորգ եկեղեցին կվերականգնվի մեկ տարվա ընթացքում:
