Հայաստանի ԱԱԾ-ն կանխել է ցանցային մարքետինգի անվան տակ գործող «բուրգի» անօրինական գործունեությունը

Հայաստանի ազգային անվտանգության ծառայության մամուլի կենտրոնը տեղեկացնում է ցանցային մարքետինգի անվան տակ գործող «ֆինանսական բուրգի» անօրինական գործունեության բացահայտման և կասեցման մասին։

«ՀՀ Ազգային անվտանգության ծառայության մարմինների կողմից իրականացված օպերատիվ-հետախուզական միջոցառումների արդյունքում բացահայտվել և կասեցվել է ՀՀ տարածքում «Questnet» միջազգային կազմակերպության անվան տակ միմյանցից անկախ գործող երկու կազմակերպված խմբերի հանցավոր գործունեությունը, որն ուղղված է եղել խաբեության միջոցով քաղաքացիներից դրամական միջոցների հափշտակմանը և այսպես կոչված ֆինանսական բուրգի ստեղծմանը»,- ասվում է հաղորդագրությունում։

Մամուլի ծառայությունից նշեցին, որ ներցանցային մարքետինգով զբաղվող «Questnet» կազմակերպությունը տարբեր երկրներում, ինչպես նաև Հայաստանի Հանրապետությունում ունենալով ներկայացուցիչներ, ինտերնետ կայքի միջոցով քաղաքացիներին վաճառել է 600-1500 ԱՄՆ դոլար արժողությամբ իբր առողջությունը կարգավորող տարբեր տեսակի ապակյա ԲԻՈ-դիսկեր, տեխնիկական այլ ապրանքներ, ինչպես նաև մինչև 8 գրամ քաշով զարդեր և վզնոցներ։

Հետագայում քաղաքացիները, հասկանալով, որ վճարած գումարը տասնյակ անգամներ գերազանցում է ապրանքի իրական արժեքը, «Questnet»-ի ներկայացուցիչներից հետ են պահանջել իրենց գումարները։

Հաղորդագրության համաձայն՝ դրան ի պատասխան նրանց առաջարկվել է շարունակել ցանցի ընդլայնման գործընթացը՝ վստահեցնելով, որ նրանք ոչ միայն կարող են վերադարձնել իրենց վճարած գումարները, այլ նաև ստանալ զգալի եկամուտ։

«Քննությամբ պարզվել է, որ «Questnet»-ի ղեկավարներ Իրանի քաղաքացիներ Ռայմոնդ Քոչարյանի և ՀՀ քաղաքացի Վաչե Մանուկյանի կողմից կազմակերպած երևանյան ցանցում ընդգրկված են եղել ընդհանուր թվով 113 քաղաքացիներ, ում վստահությունը չարաշահելու եղանակով նրանցից հափշտակել է խոշոր չափի գումարներ»,- ասվում է հաղորդագրությունում։

Քոչարյանն ու Մանուկյանը ձերբակալված են։ Քննությունը վարում է ՀՀ ԱԱԾ Քննչական վարչությունը։

 «Մենք հորդորում ենք քաղաքացիներին չգայթակղվել արագ հարստանալու ցանկությամբ և հեռու մնալ նմանատիպ խարդախներից և կասկածելի կազմակերպություններին անդամակցելուց»,- նշվում է հաղորդագրությունում։

««Questnet» կազմակերպությունների հանցավոր գործունեությունից տուժած քաղաքացիները կարող են դիմել ՀՀ ԱԱԾ Քննչական վարչություն 57-93-16 հեռախոսահամարով»,- նշեցին մամուլի կենտրոնից։ -0-