ՀՀ կառավարությունը հինգշաբթի հավանության է արժանացրել ատոմային նոր էներգաբլոկի կառուցման նպատակով հայ-ռուսական համատեղ ընկերության ստեղծման մասին որոշումը:
«Նախագծով առաջարկվում է հավանության արժանացնել Հայաստանի ատոմային նոր էներգաբլոկի միջուկային կղզյակը ռուսական արտադրության ջրային էներգետիկական ռեակտորային տեղակայանքով կահավորումը», - ասաց ՀՀ էներգետիկայի և բնական պաշարների նախարար Արմեն Մովսիսյանը կառավարության նիստի ժամանակ:
Նախարարի խոսքերով, էներգաբլոկի հզորությունը կկազմի 1060 ՄՎտ, իսկ շահագործման ժամկետը 60 տարի է:
«Ընդունված որոշման կապակցությամբ ՀՀ էներգետիկայի և բնական պաշարների նախարարությանը հանձնարարվել է ռուսական «Ատոմստրոյէքսպորտ» ընկերության հետ համատեղ ստեղծել ձեռնարկություն՝ 60 միլիոն դրամ կանոնադիր կապիտալով: Միաժամանակ կանոնադիր կապիտալի 30 միլիոն դրամը (հայկական մասնաբաժինը) կապահովվի Հայաստանի էներգետիկ ոլորտում գործող ընկերությունների եկամտի հաշվին», - ասաց Մովսիսյանը: Նրա խոսքերով, միջուկային կղզյակի համար սարքավորումների պատվերը կներկայացվի համապատասխան ռուսական ընկերություններին:
Միաժամանակ ՀՀ վարչապետ Տիգրան Սարգսյանը նշեց, որ այսօր ընդունված քաղաքական որոշմամբ համաձայնություն է տրվում ռուսական գործընկերների հետ հավասար հիմունքներով համատեղ ձեռնարկության ստեղծման համար:
«Դա ներառված է Ազգային անվտանգության խորհրդի նիստի ժամանակ հաստատված Ատոմային նոր էներգաբլոկի կառուցման ռազմավարության մեջ», - ասաց Սարգսյանը:
Հայաստանը նախատեսում է ԱԷԿ-ի նոր բլոկ կառուցել՝ մոտավորապես 1000 ՄՎտ հզորությամբ, և ՀՀ էներգետիկայի և բնական պաշարների տվյալների համաձայն՝ այս նախագիծը կարժենա մոտ 5 մլրդ դոլար։ Այս նախագծի իրականացման համար արտասահմանյան կապիտալ ներգրավելու նպատակով 2006թ. ՀՀ խորհրդարանն օրենսդրությամբ անվավեր ճանաչեց նոր ատոմային բլոկների պետական մենաշնորհի իրավունքը։ Շինարարական աշխատանքները ծրագրվում է սկսել 2011թ.-ի սկզբից։
Մեծամոր քաղաքում գործող հայկական ԱԷԿ-ը շահագործման է հանձնվել 1976-ին։ Ներկայում գործում է կայանի միայն երկրորդ բլոկը՝ 407,5 ՄՎտ հզորությամբ:
ԱԷԿ-ի ֆինանսական հոսքերը 2003—2013թթ. հանձնված են «ԻՆՏԵՐ ՌԱՈ ԵԷՍ» ՓԲԸ-ի հավատարմագրային կառավարմանը, որի սեփականատերը ռուսական «Ռոսատոմ» պետական կորպորացիան է։ Հայկական ԱԷԿ-ը, մասնագետների գնահատականներով, կարող է գործել մինչև 2016թ.-ը։--0-
