Հայաստանի Կենտրոնական ընտրական հանձնաժողովն անհիմն է համարում խորհրդարանի պատգամավորի թեկնածու Հմայակ Հովհաննիսյանի՝ ԿԸՀ թիվ 10 ընտրատարածքում ընտրությունների վերաբերյալ ԿԸՀ որոշման անօրինականության վերաբերյալ մեղադրանքները։
Հայաստանի քաղաքագետների ասոցիացիայի ղեկավար Հմայակ Հովհաննիսյանն, ով թիվ 10 ընտրատարածքում մասնակցում է Հայաստանի լրացուցիչ խորհրդարանական ընտրությունների, հայտարարել է, որ անօրինական է համարում ԿԸՀ հոկտեմբերի 20-ի որոշումը՝ հունվարի 10-ին լրացուցիչ ընտրություններ նշանակելու վերաբերյալ։
Հաղորդագրությունում նշվում է, որ օրենքի համաձայն, ՀՀ կենտրոնական ընտրական հանձնաժողովն օրենքով սահմանված դեպքերում ընտրություններ նշանակում է` ընդունելով անհատական որոշում: Իր անհամաձայնությունն ընտրությունը 2010 թ. հունվարի 10-ին նշանակելու` ՀՀ կենտրոնական ընտրական հանձնաժողովի 2009 թ. հոկտեմբերի 20-ի որոշման հետ Հմայակ Հովհաննիսյանը կարող էր արտահայտել` ՀՀ ընտրական օրենսգրքի և ՀՀ վարչական դատավարության օրենսգրքի պահանջներին համապատասխան:
ԿԸՀ-ն անդրադարձել է նաև Վլադիմիր Կոստանյանի` ս.թ. նոյեմբերի 20-ին` նախընտրական քարոզչության համար սահմանված ժամկետից շուտ, հանրահավաք կազմակերպելու հարցին։
ԿԸՀ-ում ընդգծեցին, որ ՀՀ օրենսդրությունը երբեք և ոչ մի դեպքում չի արգելում ՀՀ որևէ քաղաքացու, անկախ ժամանակից և այլ պայմաններից, ՀՀ օրենսդրությանը համապատասխան անցկացնել ժողովներ, հանդիպումներ, հրապարակային քննարկումներ, բանավեճեր, հանրահավաքներ, երթեր, ցույցեր և այլն:
ԿԸՀ-ի՝ լրացուցիչ ընտրություններ անցկացնելու որոշումը պայմանավորված է նրանով, որ սեպտեմբերի 7-ին 10-րդ ընտրատարածքից մեծամասնական համակարգով ազգային ժողովի պատգմավոր ընտրված Խաչատուր Սուքիասյանը կամավոր վայր է դրել պատգամավորական լիազորությունները: Խոշոր ձեռներեց և խորհրդարանի պատգամավոր Խաչատուր Սուքիասյանն ավելի քան մեկ տարի գտնվում էր հետախուզման մեջ՝ Երևանում մարտի 1-2-ի զանգվածային անկարգությունների կապակցությամբ։ 2009թ. սեպտեմբերի 1-ին Սուքիասյանը հանձնվել է իրավապահներին: Որպես կասեցման միջոց ընտրվել է կալանքը: Սակայն արդեն սեպտեմբերի 4-ին նա ազատ է արձակվել՝ չբացակայելու մասին ստորագրությամբ։ -0-
