342 անուն դեղամիջոցների միայն 22 տոկոսն է արտադրվում Հայաստանում. ուսումնասիրություն

342 անուն դեղամիջոցների միայն 22 տոկոսն է (76 անուն) արտադրվում Հայաստանում, երեքշաբթի ասաց «Լիկվոր» դեղագործական ընկերության տնօրեն Սերգեյ Մաթևոսյանը Հայաստանի դեղագործության մրցունակության երկրորդ համաժողովի ընթացքում:

Նրա խոսքերով, հայկական շուկայում ներկայացվող ղեղամիջոցների միայն 14 տոկոսը կամ 445 անունն են արտադրվում երկրի ներսում, միաժամանակ 22 տոկոսը կամ 718 անունը ներկրվում են ԱՊՀ երկրներից, մնացած 64 տոկոսը՝ այլ երկրներից:

«Ներկայացված ցուցանիշները վկայում են, որ հայկական դեղագործական շուկան լրջորեն կախված է ներկրումից, քանի որ նույնիսկ ԱՊՀ երկրներից ներկրված դեղամիջոցների քանակը կրկնակի անգամ գերազանցում է տեղական արտադրության ցուցանիշները», - ասաց Մաթևոսյանը:

Այնուամենայնիվ, ինչպես նշեց փորձագետը, Հայաստանում դեղամիջոցների տեղական արտադրության ոլորտը վերջին տարիներին դինամիկ աճում է:

«Հայաստանում դեղամիջոցների արտադրության ոլորտի հիմնական խնդիրը Հայաստանում ջեներիկ դեղամիջոցների (generic կամ արտոնագրված հայտնի դեղամիջոցների կրկնօրինակները) ցածր պորտֆոլիոն է, ԱՊՀ երկրների հետ մրցակցության բարդությունը, ֆինանսական աղբյուրների պակասը, շուկայում անբարոյական մրցակցությունը, որակյալ կադրերի պակասը, GMP հաստատագրված ստանդարտների բացակայությունը», - ասաց Մաթևոսյանը:

Ինչպես կարծում է դեղագործական ոլորտի ներկայացուցիչը, այդ ամենը խոչընդոտում է դեղամիջոցների արտադրման ներքին շուկայի զարգացմանը, հայկական արտադրության մրցունակության բարձրացմանն ու արտահանման հնարավորություններին:

Հայաստանում դեղամիջոցների ներկրման ծավալը 2009 թ.-ի տասն ամսվա ընթացքում կազմել է 60,38 միլիոն դոլար՝ ողջ 2008 թ.-ի 83,93 միլիոն դոլարի փոխարեն:

Հայկական դեղամիջոցների արտադրության ծավալը 2009թ.-ի տասն ամսվա ընթացքում ավելացել է 113 միլիոն դրամով և կազմել 1,737 միլիարդ դրամ: 2009 թ.-ի տասն ամսվա ընթացքում հայկական դեղագործական արտադրության արտահանման ծավալը կազմել է 2,78 միլիոն դոլար՝ ողջ  2008թ.-ի 3,46 միլիոն դոլարի համեմատ:

Հայաստանի դեղագործության մրցունակության երկրորդ համաժողովի կազմակերպիչներն են ՀՀ առողջապահության նախարարությունը, Մրցունակ մասնավոր հատված ծրագիրը (Competitive Armenian Private Sector – CAPS/USAID), Դեղերի և բժշկական տեխնոլոգիաների փորձագիտական կենտրոնը, Հայաստանի դեղ արտադրողների և ներմուծողների միությունը, Զարգացման հայկական գործակալությունն ու Հայաստանի ազգային մրցունակության հիմնադրամը:-0-