Հայաստանի ՀՕՊ մարտական հաշվարկները պատրաստ են ցանկացած մարտական առաջադրանքի. ՊՆ

Հայաստանի հակաօդային պաշտպանության ուժերի մարտական հաշվարկները պատրաստ են կատարելու ցանկացած մարտական առաջադրանք:

Ինչպես «Նովոստի-Արմենիա» գործակալությանը հայտնեցին Հայաստանի պաշտպանության նախարարության մամուլի ծառայությունից, հենակետերում այս մասին զեկուցվեց ՀՀ պաշտպանության նախարար Սեյրան Օհանյանի՝ նոյեմբերի 27-ին Գեղարքունիքի մարզ հակաօդային պաշտպանության զորքերի դիվիզիոններ ու մարտկոցներ կատարած աշխատանքային այցի ընթացքում։

«Սեյրան Օհանյանը տեղում ծանոթացավ մեր երկրի օդային սահմանները հսկող ստորաբաժանումների ծառայությանը, մարտական պատրաստականությանը և սոցիալ-կենցաղային պայմաններին»,- ասվում է հաղորդագրությունում։

Նախարարը հանդիպեց և զրուցեց նրանց հետ, հետաքրքրվեց ծառայության առանձնահատկություններով, պարտականությունների իմացությամբ, առաջադրված խնդիրների կատարման պատրաստակամությամբ, ինչպես նաև հրամանատարական կազմին հանձնեց անվանական ժամացույցներ։

Սեյրան Օհանյանը եղավ նաև մարտական դիրքերում, որտեղ զօր ու գիշեր մարտական հերթապահություն են իրականացնում զինծառայողները` հսկելով իրենց վստահված օդային սահմանը:

Զինվորներից հետաքրքրվելով մարտական հերթապահության արդյունքներով` նախարարը նրանց մաղթեց կամք ու կորով և խաղաղ ծառայություն:

Աշխատանքային շրջայցի ավարտին նախարարը եղավ նաև Վարդենիսի կայազորային զինվորական հոսպիտալում: Շրջելով վիրաբուժական և թերապևտիկ բաժանմունքներում` Սեյրան Օհանյանը ծանոթացավ բուժհաստատության տեխնիկական հագեցվածությանը, զրուցեց բուժծառայողների և այնտեղ բուժվող զինվորների հետ։ -0-