Հայաստանի դեմոկրատական կուսակցությունը մտադիր է դեկտեմբերի 1-ին հանդիպում անցկացնել հանրապետության մի շարք քաղաքական կուսակցությունների հետ՝ հայ-թուրքական հարաբերությունների համատեքստում համատեղ գործողությունների ծրագիր մշակելու նպատակով, ասաց կուսակցության առաջնորդ Արամ Սարգսյանը՝ պատասխանելով «Նովոստի-Արմենիա» գործակալության հարցին:
«Դեմոկրատական կուսակցությունը դեմ է հայ-թուրքական արձանագրություններին այն տեսքով, որով դրանք ներկայացվել են վավերացման, և մոտ ժամանակներս մենք մտադիր ենք այլ կուսակցությունների հետ միասին այդ ուղղությամբ մի շարք քայլեր ձեռնարկել», - ուրբաթ մամուլի ասուլիսի ժամանակ ասաց Սարգսյանը:
Նա պարզաբանեց, որ հրավիրված կուսակցությունների ներկայացուցիչների հետ հանդիպման ժամանակ, որոնց թվում են նաև Հայ Յեղափոխական Դաշնակցությունը, «Ժառանգություն» և «Նոր ժամանակներ» կուսակցությունները, կքննարկվի հետագա գործողությունների վերաբերյալ համապատասխան հայտարարությունը, որը կներկայացվի հանրությանը:
Խոսելով արձանագրությունների մասին՝ Սարգսյանը նշեց, որ փաստաթղթերը պարունակում են անգրագետ ձևակերպումներ, ինչն անընդունելի է միջազգային դիվանագիտական պրակտիկայում:
«Փաստաթղթերում կան դրույթներ, որոնք հակասում են Անկախության հռչակագրին, և անհրաժեշտ է դրանք վերանայել՝ ելնելով Հայաստանի պետական և ազգային շահերից», - ասաց նա:
Կուսակցության առաջնորդի խոսքերով՝ այդ հարցին անհրաժեշտ է շատ լուրջ մոտենալ, քանի որ եթե հայ-թուրքական արձանագրությունների դրույթներն անվերապահորեն ընդունվեն, ապա Հայաստանը միջազգային հանրության աչքերում կկորցնի այն բավականին լուրջ հեղինակությունը, որին հասել է մի քանի տարիների ընթացքում:
Հայաստանի դեմոկրատական կուսակցությունը նոյեմբերի սկզբին խորհրդարան առաջարկություն էր ներկայացրել հայ-թուրքական արձանագրությունների Հուշագրի մշակման վերաբերյալ, իսկ ավելի վաղ առաջարկել էր ընդունել հայ-թուրքական ներկայիս սահմանների ճանաչման անհնարինությունը նախատեսող, Հայոց ցեղասպանության միջազգային ճանաչման գործընթացի դադարեցումը թույլ չտվող, ինչպես նաև դրա հետևանքների վերացման գործընթացի դրույթներ։ --0—
