Հայաստանը կողմ է ՄԱԿ-ի ԱԽ-ում Ճապոնիայի մշտական անդամակցությանը

Հայաստանն աջակցում է ՄԱԿ ԱԽ-ում Ճապոնիայի մշտական անդամակցությանը, ասվում է Տոկիոյում ՀՀ ԱԳ նախարար Էդվարդ Նալբանդյանի և Ճապոնիայի ԱԳ նախարար Կացույա Օկադայի հանդիպման արդյունքում ընդունված համատեղ հայտարարության մեջ:

Նալբանդյանը Ճապոնիայի կառավարության հրավերով նոյեմբերի 25-27-ը պաշտոնական այցով գտնվում է Ճապոնիայում:

ՀՀ ԱԳ նախարարության մամուլի ծառայության կողմից «Նովոստի-Արմենիա» գործակալությանը տրամադրված տեղեկատվության համաձայն՝ հանդիպման ընթացքում կողմերը պատրաստակամություն հայտնեցին համագործակցել Միացյալ Ազգերի Կազմակերպության և այլ միջազգային կազմակերպությունների շրջանակներում, ակտիվորեն աշխատել՝ ուղղված ՄԱԿ-ի Անվտանգության խորհրդի բարեփոխման արագ իրականացմանը՝ ներառյալ ԱԽ մշտական և ոչ մշտական անդամների քանակի ավելացումը:

Արտգործնախարարները պատրաստակամություն հայտնեցին նաև համագործակցել՝ ուղղված Եվրոպայում և ասիա-խաղաղօվկիանոսյան տարածաշրջանում շարունակական անվտանգության պահպանմանը:

Նալբանդյանն ու Օկադան կարծիքներ փոխանակեցին նաև ԵԱՀԿ Մինսկի խմբի շրջանակներում ղարաբաղյան հակամարտության կարգավորման, ինչպես նաև հայ-թուրքական հարաբերությունների կարգավորման գործընթացի շուրջ: Կողմերը ընդգծեցին, որ անհրաժեշտ է հակամարտությունը կարգավորել խաղաղ ճանապարհով՝ միջազգային իրավունքի սկզբունքներին և նորմերին համապատասխան:

Նախարարները քննարկեցին նաև փոխադարձ հետաքրքրություն ներկայացնող հարցերի լայն շրջանակ, որոնք վերաբերում են, մասնավորապես, երկու երկրների միջև քաղաքական երկխոսության և տնտեսական հարաբերությունների զարգացմանը՝ կարևորելով երկու երկրների գործարար օղակների միջև կապերը:

Հայկական կողմը շնորհակալություն հայտնեց Ճապոնիային «Աջակցություն պաշտոնական զարգացմանը» ծրագրի շրջանակներում ցուցաբերվող հետևողական օգնության համար և հույս հայտնեց, որ այդ համագործակցությունը կշարունակվի:-0-