ԵՐԵՎԱՆ, 24 նոյեմբերի. /Նովոստի-Արմենիա/. «Հայկական ժամանակ» ընդդիմադիր թերթի խմբագիր Նիկոլ Փաշինյանը, ով մեղադրվում է իշխանության ներկայացուցչի նկատմամբ բռնություն կիրառելու և Երևանում 2008 թ.-ի մարտի 1-ին զանգվածային անկարգություններ կազմակերպելու մեջ, փաստաթղթեր է ներկայացրել, որոնք անհրաժեշտ են մայրաքաղաքի 10-րդ ընտրատարածքից որպես խորհրդարանի պատգամավորի թեկնածու գրանցվելու համար, «Նովոստի-Արմենիա» գործակալությանը տեղեկացրեց Կենտրոնական ընտրական հանձնաժողովի մամուլի քարտուղար Տաթև Օհանյանը:
Այսպիսով, 10-րդ ընտրատարածքի պատգամավորների թեկնածուների թիվը հասել է յոթի: Նրանց թվում են չորս անկուսակցական՝ այդ թվում նաև Նիկոլ Փաշինյանը, և կուսակցությունների երեք ներկայացուցիչ՝ Արա Սիմոնյանը՝ «Ազգային միաբանությունից», Ռաֆայել Այվազյանը՝ Դաշնակցությունից և Դավիթ Հակոբյանը՝ Հայաստանի Մարքսիստական կուսակցությունից:
ԿԸՀ-ի՝ լրացուցիչ ընտրություններ անցկացնելու որոշումը պայմանավորված է նրանով, որ սեպտեմբերի 7-ին 10-րդ ընտրատարածքից մեծամասնական համակարգով ազգային ժողովի պատգմավոր ընտրված Խաչատուր Սուքիասյանը կամավոր վայր է դրել պատգամավորական լիազորությունները: Խոշոր ձեռներեց և խորհրդարանի պատգամավոր Խաչատուր Սուքիասյանն ավելի քան մեկ տարի գտնվում էր հետախուզման մեջ՝ Երևանում մարտի 1-2-ի զանգվածային անկարգությունների կապակցությամբ։2009թ. սեպտեմբերի 1-ին Սուքիասյանը հանձնվել է իրավապահներին: Որպես կասեցման միջոց ընտրվել է կալանքը: Սակայն արդեն սեպտեմբերի 4-ին նա ազատ է արձակվել՝ չբացակայելու մասին ստորագրությամբ։
ԿԸՀ-ի մամուլի քարտուղար խոսքերով, պատգամավորների թեկնածուների փաստաթղթերի ընդունումն իրականացվում է մինչև նոյեմբեր 26-ը, իսկ դեկտեմբերի 1-6-ը կանցկացվի թեկնածուների գրանցումը:
Այժմ Երևանում 2008 թ.-ի մարտի 1-ին զանգվածային անկարգություններ կատարելու և իշխանության ներկայացուցչի հանդեպ բռնություն գործադրելու մեջ մեղադրվող Փաշինյանի հանդեպ դատավարություն է ընթանում: Կոնգրեսը որոշել է չմասնակցել խորհրդարանի լրացուցիչ ընտրություններին և չսատարել ոչ մի թեկնածուի, բացառությամբ այն դեպքերի, «երբ դա կարող է նպաստել քաղբանտարկյալների ոտնահարված իրավունքների վերականգնմանը»: -0-
