ԵՐԵՎԱՆ, 24 նոյեմբերի. /Նովոստի-Արմենիա/. Հայաստանն ու Ռուսաստանը բարձր են գնահատում երկկողմ միջխորհրդարանական համագործակցությունը, երեքշաբթի «Նովոստի-Արմենիա» գործակալությանը տեղեկացրեցին ՀՀ ԱԺ հասարակայնության հետ կապերի վարչությունից:
Տեղեկատվության համաձայն՝ ՀՀ ԱԺ խոսնակ Հովիկ Աբրահամյանը երկուշաբթի հանդիպել է Ռուսաստանի Դաշնության Պետական դումայի նախագահ Բորիս Գրիզլովի հետ: Հանդիպումը տեղի է ունեցել Մոսկվայում անցկացվող Սևծովյան տնտեսական համագործակցության Խորհրդարանական վեհաժողովի լիագումար նիստի շրջանակներում:
Զրուցակիցները կարևորել են երկու դաշնակից երկրների խորհրդարանների փոխգործակցությունը, որը համալրում է ՀՀ և ՌԴ նախագահների բարձր մակարդակով իրականացվող քաղաքական երկխոսությունը:
Աբրահամյանն ընդգծել է, որ Հայաստանը մշտապես զգացել է ՌԴ զորակցությունը, որի համար հայտնել է հայկական կողմի երախտագիտությունը: Այդ համատեքստում նա կարևորել է ՌԴ կողմից ՀՀ-ին տրամադրված արտոնյալ վարկը, որն օժանդակեց համաշխարհային ֆինանսատնտեսական ճգնաժամի հետևանքներին դիմագրավելուն:
Հանդիպման ընթացքում կողմերը մանրակրկիտ քննարկել են երկկողմ միջխորհրդարանական համագործակցության հարցերը: Նրանք բարձր են գնահատել խորհրդարանական պատվիրակությունների համագործակցությունը միջազգային կազմակերպությունների շրջանակներում:
Զրուցակիցները նաև կարծիքներ են փոխանակել տարածաշրջանային համագործակցության խնդիրների, առանց նախապայմանների հայ-թուրքական հարաբերությունները կանոնակարգելու գործընթացի, Արցախի հիմնախնդրի շուրջ:
Հանդիպման ընթացքում նաև պայմանավորվածություն է ձեռք բերվել մոտակա ամիսների ընթացքում ՌԴ Պետական դումայի նախագահի Հայաստան այց կատարելու վերաբերյալ:-0-
