ԵՐԵՎԱՆ, 24 նոյեմբերի. /Նովոստի-Արմենիա/. ՀՀ արտգործնախարար Էդվարդ Նալբանդյանը հայտարարել է, որ Հայաստանի և Ադրբեջանի նախագահներ Սերժ Սարգսյանի ու Իլհամ Ալիևի միջև կիրակի Մյունխենում կայացած բանակցությունների ընթացքում որոշակի առաջընթաց է արձանագրվել:
«Չեմ կարող ասել, որ բանակցությունները հարթ և դյուրին էին, սակայն որոշակի հարցերի շուրջ առաջընթաց է արձանագրվել, որը թույլ է տալիս պահպանել այն դրական միտումը, որը նկատվում էր վերջին կես տարվա ընթացքում տեղի ունեցած ութ հանդիպումների ժամանակ», - լրագրողներին ասել է Նալբանդյանը:
ՀՀ ԱԳ նախարարն անդրադարձել է նաև այն հարցին, թե ինչու նախագահների յուրաքանչյուր հանդիպումից հետո Հայաստանում և Ադրբեջանում հնչում են բանակցությունների վերաբերյալ տարբեր մեկնաբանություններ:
«Հանդիպումներից հետո Հայաստանում հնչող հայտարարությունները համահունչ են այն հայտարարություններին, որոնցով հանդես են գալիս համանախագահները, այսինքն համապատասխանում են իրականությանը», - ասել է Նալբանդյանը:
Ղարաբաղի հակամարտության կարգավորմանը նվիրված՝ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հերթական հանդիպումը տեղի է ունեցել 2009 թ.-ի նոյեմբերի 22-ին Մյունխենում: Հանդիպման արդյունքում նախագահները հանձնարարել են իրենց երկրների արտգործնախարարներին շարունակել աշխատանքը ԵԱՀԿ Մինսկի խմբի համանախագահների հետ:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:-0-
