Լրագրողական կրթությունը Հայաստանում արդիականացման կարիք ունի, երկուշաբթի լրագրողներին ասաց ՀՀ կրթության և գիտության նախարար Արմեն Աշոտյանը:
«Ժամանակակից աշխարհը փոփոխություններ է մտցնում կյանքի բոլոր ոլորտներում և, մասնավորապես, փոփոխություններ է թելադրում մեդիա-ոլորտում: Այս զարգացումների կապակցությամբ անհրաժեշտ է բարեփոխել լրագրողական կրթության ոլորտը», - ասաց նախարարը:
Նրա խոսքերով՝ անհրաժեշտ է ստեղծել նոր մասնագիտություններ լրագրության ներսում և օգտագործել նորագույն տեխնոլոգիաների հնարավորությունները:
Խոսելով հայկական ԶԼՄ-ների հասցեին հնչած քննադատության մասին՝ Աշոտյանը նշեց, որ ցանկության դեպքում կարելի է քննադատել գոյություն ունեցող բոլոր ինստիտուտները:
«ԶԼՄ-ներն իրենց զարգացմամբ չեն կարող առաջ լինել քաղաքական ինստիտուտներից, այդ պատճառով անհրաժեշտ է հանգիստ վերաբերվել Հայաստանի զանգվածային լրատվամիջոցների հասցեին հնչող քննադատությանը», - ավելացրեց նախարարը:-0-
