ԱՊՀ-ն ինստիտուտներ է ձևավորում ավելի արդյունավետ և գործնական համագործակցության համար, լրագրողներին տեղեկացրել է ՀՀ վարչապետ Տիգրան Սարգսյանը:
«ԱՊՀ ձևաչափի շրջանակներում ձևավորվում են նոր ինստիտուտներ, նշեմ դրանցից երկուսը՝ Եվրասիական բանկը, որը կարող է անդամ-երկրներին տրամադրել մինչև 15 միլիարդ դոլարի վարկեր, և Հակաճգնաժամային հիմնադրամը, որտեղ արդեն կուտակվել է շուրջ 8,5 միլիարդ դոլար: Այն դեպքում, եթե անդամ-երկրները տարածաշրջանային նշանակություն ունեցող հակաճգնաժամային ծրագրեր են ներկայացնում, նրանք կարող են օգտվել այդ հիմնադրամի միջոցներից», - ասել է վարչապետը:
Սարգսյանը ընդգծել է, որ այս երկու օրինակները վկայում են այն մասին, որ ԱՊՀ-ն ձևավորում է համապատասխան կառույցներ, որոնք պետք է երկրների միջև համագործակցությունը դարձնեն առարկայական և գործնական:
Հայաստանի վարչապետ Տիգրան Սարգսյանն ուրբաթ Յալթայում մասնակցել է ԱՊՀ կառավարությունների ղեկավարների խորհրդի հերթական նիստին։Նիստի շրջանակներում քննարկվել է ավելի քան 20 նախագիծ, որոնք վերաբերում են տնտեսական և հումանիտար ոլորտներում, միգրացիոն քաղաքականության և անվտանգության ապահովման հարցերում ԱՊՀ երկրների համագործակցության ակտիվացմանն ու խորացմանը: Ստորագրվել են միջազգային տրանսպորտային միջանցքների զարգացման համաձայնագիրն ու նորարարության ոլորտի համաձայնագիրը, ինչպես նաև հարկային հետաքննությունների մարմինների որոշումը:--0--
