Հայաստանի և Ադրբեջանի նախագահներ Սերժ Սարգսյանն ու Իլհամ Ալիևը կարծիքներ են փոխանակել ղարաբաղյան հակամարտության կարգավորման շուրջ կիրակի Մյունխենում Ֆրանսիայի գլխավոր դեսպանի նստավայրում տեղի ունեցած հանդիպման ժամանակ, հաղորդում է «ՌԻԱ Նովոստին»:
«Հանդիպմանը, որին մասնակցել են Հայաստանի և Ադրբեջանի արտգործնախարարներ Էդվարդ Նալբանդյանն ու Էլմար Մամեդյարովը, ինչպես նաև ԵԱՀԿ Մինսկի խմբի համանախագահներ Ռոբերտ Բրադտկեն (ԱՄՆ), Բեռնար Ֆասիեն (Ֆրանսիա), Յուրի Մերզլյակովը (Ռուսաստան) և ԵԱՀԿ գործող նախագահի անձնական ներկայացուցիչ Անջեյ Կասպրշիկը, կարծիքներ են փոխանակվել ղարաբաղյան հակամարտության կարգավորման ներկա իրավիճակի և բանակցությունների հեռանկարների շուրջ», - ասվում է տեղեկատվության մեջ:
Նախագահները ժամանել են Մյունխեն ղարաբաղյան հակամարտության կարգավորման ԵԱՀԿ Մինսկի խմբի երեք համանախագահ-երկրների՝ ԱՄՆ-ի, Ֆրանսիայի և Ռուսաստանի հրավերով: Սարգսյան-Ալիև վերջին հանդիպումը տեղի է ունեցել հոկտեմբերի 8-ին Քիշնևում՝ ԱՊՀ պետությունների ղեկավարների գագաթնաժողովի շրջանակներում: Այդ ժամանակ Հայաստանի և Ադրբեջանի նախագահները պայմանավորվել են շարունակել ղարաբաղյան հակամարտության խաղաղ կարգավորմանն ուղղված բանակցությունները:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան:-0-
